Iray kabusol na baley (3)

Diad apalabas ya listaan ag ko abitla irayan ngaran daray kabusol na baley:

1. Panfilo Lacson - protektor na droga, mankuakuanan ya malinis, dakel so kasalanan to ed baley balet maksil ed saray totoo na korte.

2. Manny Pangilinan - dummy na Salim Empire ed Pilipinas, say lupa na sayan impiryo, labay da lan aksubien so amin ya public utilities, aliwan baley so minabang balet say Indonesia nen Salim, traydor ed bansa, ontutulong balet kwarta ya nanlapud lamlamang ed loob na bansa; anggapoy inloob ya kwarta na Salem group; iligal ya panagsingil na balbaleg ya bayar ed kuryinti, masaol ya pamaakaran ed Smartbro, pankakuartaan da labat iray totoo.

3. Court of Appeals - kaokolan lan bagbagen yan korte lapud ditan nasasaliw so katunungan.

4. Korti Suprima - say obong daray okom ya mureng, ginawa dan ligal so cyber crime law, sangkamurengan ya tutul na Korti Suprima lapud saray akairong et unqualified tan incompetent.

5. Sandiganbayan - sakey met ginawa dan pamaakaran ya mangokom ed saray korakot balet sikara so korakot tan pikewet.

6. Iray angkelag ya korti, RTC, MTC etc. - Numiro uno ed inkabuanges ed panag-iter na tutul, mabayag ya panagdisisyon, nababayaran met ira ditan singa amay sakey ya nandisisyon ed kaso kontrad Marcos ya ag konon nayari ipasoot so disisyon na arum ya korti ed paway na bansa.

7. Iray political dynasty - Nen embeneg ya iliksion walay nankandidato ya Perez ed barangay San Vicente dia ed Urdaneta, tinaktakot na pulis imay onbatik ya milaban ed sikara, bwisit irayan Perez ya so kanonotan da sikara labat sp manuley ed baley mi, ontan so kipapasen daray arum ya baley tan probinsia ed Pilipinas, paksiaten iray political dynasty, unaan la iray Marcos.

Iray kabusol na baley (2)

Siopa ni ray kabusol na baley ed iyaliguas to?

1. Iray okom ya korap, pikewet ya so nononotan da labat et so ikapal na pitaka da. Say hudikaturan siansia so numiro uno ed amin ya opisina na burukrasya ed inkakorap. Ed inkabayag dan mangiter na disisyon parad kaabigan na baley, naanggapoy ilalo so baley ya iray nantakew, iray nanggaway mauges et naitdan ya dugan dusa.

Aga onaliguas so baley no wala ira ditan ed Supreme Court, Court of Appeals, RTC, MTC etc. Anggad wad tan ira ya akairong ya aga ira mangiiter na dugan tutul ta nababayaran ira, anggapoy pansabian na riporma ed gobierno.

Sikaton no say gelew et nasabi, say unaan ya paltogan iray okom.

2. Iray pulis ya sikara nira so managkonsinti na mauges ya kagagawa. Say CIDG so numiro unon sindikato. Sikara so protektor na drug lords. Lapud akasapat la ra ed sangkatageyan a betang ed law-enforcement agency ed bansa, anggapoy ilalon ontonda iray kriminalidad ed baley. Iray okom ya nababayaran tan irayay pulis ya managpatey, managkonsinti na droga, operator na gun-for-hire, sikara so totoon baleg met a samben ed progriso na baley. Ag nasabi so aliguas na baley na wadtan ira.

No onsalindak so ribolusiyon, say anak-na-baley ya miembro na ngayew a manangiyagel ed interes na baley et kaokolan dan sansakeyen a nguraten iray pulis.

3. Iray mamaulo na PDEA ya sikara so numiro unon protiktor daray drug lords. Lapud mabayag tan korap so hustisya ed baley, manpipiyesta iray managlakoy droga. Lapud nababayaran iray pulis tan PDEA, iray drug lord et maligsa lapud tuloy tuloy so produksiyon na droga. Iray naeerel labat et small-time. 

4. Iray pulitiko ya so interes da labat et say iyabig na laman da tan pamilya da. No talagan maung kan politiko, suportaen mo so anti-political dynasty anggano aya et somlang ed interes mo. Lapud anggapoy nan-isponsor ya politiko ed saya likod ed saray arum, amin a miembro na Konggriso et kabusol na baley. Ipilad dia iray politiko ed probinsia, binaley-baley tan bara-barangay.

5. Iray akairong ed opisina na ahensiya na gobierno ya korap. Numiro uno dia so BOC, DPWH, DepEd, DAR, DND, NIA etc.

Saray toon kabusol na Pilipino tan akin [Enemies of the Filipino people and why]

1. Akalistan numiro uno ya kabusol daray Pilipino iray pamilya Marcos. Anggapo ni asumpalan na dakel a kaso laban ed sikara lapud inkapekewet na sistema na katunongan diad sayan bansa.

Dakel so tinatakew da ya ag ni nipawil ta akaamot ed saray Swiss bank accounts da. Ilalastog ni nen Imelda ed sakey ya BBC documentary ya walaan iray kuwarta ya onsulok ed $ 900 billion dollars. Angalaan da so sayan kabaleg a kuwarta no ag say impanyirong nen Ferdinand ed Malacanang?

2. Si Danding Cojuangco et sakey ya crony nen Marcos ya nankuwarta met ed gobierno. Benben toy San Miguel Corporation tan arum ni ran kompanya.

3. Sakey met si Lucio Tan ya crony met nen Marcos. Sangkamayamanan ed Pilipinas ya gawa toy PAL. Say padisir ko walay baleg ton papil ed manipulasyon na disisyon ed Korti Suprima. Walay baleg ya kaso to lapud ag to manbabayar na buis. Pigaran bilyon ya pisos ya ya makatulong komon ed gobierno, singa pamaalagey na ospital.

4. Sakey ya crony nen Marcos si Roberto Ongpin ya anggad natan et manmamanipula na negnegosyo ed Pilipinas. Amay kaso na DBP et sakey ed saray pinankuwartaan to.

5. Si Juan Ponce Enrile ya pangolo na Sinado et akinabang ed oley nen Marcos. Initdan day logging concessions to. Diad Caraga, walay kompanya tod man ya manggagaway posporo.

6. Si Fidel Ramos ya datin pangolo ya taga-Pangasinan et sakey met ed saray too nen Marcos. Akinabang ed oley to nipaakar ed Expo Pilipino tan IPPs sikaton baleg so singil na kuryinti anggad natan.

7. Si Gloria Macapagal-Arroyo tan say asawa ton si Mike Arroyo ya dakerakel so anomalyan agawa nen oley da. Anggad natan ag ni ra nikulong ed Bilibid.

8. Say pamilya Aquino ya anggad natan anggapo ni nagagawa ed panangibonog na Hacienda Luisita. Akinabang ira ed SCTEX lautla yay pangolo natan.

9.  Saray masisiban politiko, congressman, mayor, councilor, ya nonoten day ikapal na pitaka da.

10. Saray totoo na PRC ya walad likod na pamaakaran a samsamen day Scarborough tan Kalayaan.