Panagkerew na anunsio ed Balon Silew

Onkekerew na anunsio so Balon Silew ta piano naipalapag so ontombok ya paway to.
Mangaawat kami na anunsio'd negosio, kasal, binyag, togiopan dara'y mankaklasi
(reunion), eleksion tan antokaman ya nayarin iyanunsio. Saraya so bili na
anunsio:

Beneg ya sakob (paway) P7000 (dikolor)
Beneg ya sakob (loob) P5500 (dikolor)
Arap ya sakob (loob) P6000 (dikolor)
Sakey bolong (laman) P5000 (dikolor)
Sakey bolong P4500 (BW)
3/4 na bolong P3000 (BW)
1/2 na bolong P2000 (BW)
1/4 na bolong P1000 (BW)
1/8 na bolong P 500 (BW)

Mantepet ed sayan numero: 09152881008 odino mankorit na email ed
balonsilew@yahoo.com.

Itandoro so Pangasinan; mansalita, mankorit tan manbasa'y Pangasinan!

Tawag para'd kontribusion ed Balon Silew Tn 10 Blg. 1 (2010)

Mantatawag so Balon Silew ya kontribusion ed anlong, antikey ya tongtong
(1500-3000 ya salita), salaysay (1000 ya salita), balita, konbilay (novel)(sakey
tekap [chapter] 3000 salita; walaay walora anggad sampluran tekap); pangiyolog
na maltaw ya litiratura ed Pangasinan: anlong, antikey ya tongtong odino
konbilay; anlong odino antikey ya tongtong ed Iloko; anlong odino antikey ya
tongtong ed Binubolinao; salaysay ed Inglis nipaakar ed Pangasinan; tan kansion
ed Pangasinan. Ipawit ira ed balonsilew@yahoo.com.

Unaan ya deadline: Iniro 31, 2010
Otit ya deadline: Pibriro 15, 2010

Kaokolan so dumadasig (columnist) ed Balon Silew

Kaokolan mi so sumusulat na dasig ed Balon Silew. No sarag yo so mansulat ya
antikey ya salaysay (1000 salita) ed salitan Pangasinan nipaakar ed amta yon
maung (espesialisasion) singa nipaakar ed panagdalos, panagsigay, awaran na
Pangasinan, bilay na istudianti, bilay ed biektaew, panag-anlong, panag-alwar ed
sakit, kanonotan daray maistro/maistra ed abeba, atagey ya eskuela odino
kolihio, kakabatan ed ley (legal affairs), isports (odino pakasilan), panangaro
(singa Dear Dr. Love) tan antokaman ya nayarin isulat, mangipawit kayo'y
proposal ed balonsilew@yahoo.com tan sample na inkorit yo. Makaoley kayo no
antoy ingaran yo'd dasig yo ed Pangasinan. Aliwan patbek so panaglitra ta siak
bilang editor/manangikurang so makaoley ya manapiger.

Unaan ya deadline: Iniro 31, 2010
Otit ya deadline: February 15, 2010

Balon Silew akapaway la! Mangaliw ki la!

Mangaliw kila, P50 kada kopia biig ni'd lokal odino internasional ya bili na pangibuson.

Walay 49 ya kopia ed San Carlos City ed

DSS Prints & Designs

Quezon Boulevard, San Carlos City

Proprietor: Mrs. Digna S. Selmo

09291693774 tan (075)532 2594

20 kopia ed

Mamalol's Restaurant
297 Tapuac District
c/o Rob Erfe-Mejia
09164749272

tan 10 kopia ed

Red Designs
kaabay lamlamang na Mamalol's
c/o Red Erfe-Mejia

Odino si Simon Vistro 09174914495, sfbrvistro[at]gmail.com

tan 100 kopia ed kinen

Erwin S. Fernandez
4 Mitura St. San Vicente West, Urdaneta City
09152881008
win1tree[at]yahoo.com

Panagkerew na anunsio para'd Balon Silew

Saray anunsio so bilay na Balon Silew ta pian ag napoltot so panangipalapag na
magasin. Say bili na sarayan anunsio et: loob na sakob ed arapan: P 1200 (boo),
P 600 (kapaldua), P 350 (kapat); ed loob na sakob ed beneg: P 1200 (boo), P 600
(kapaldua), P 350 (kapat); tan beneg ya sakob: P 2000 (boo), P 1000 (kapaldua),
P 500 (kapat).

Alimbawa na anunsio: panangibano na saray wadmad biektaew, panangibalitay kasal,
binyag, anibersario; doipo dara'y mankaklasi (reunion); produkto odino serbisio;
panangiamta na saray eskuelaan, unibersidad tan antoniran nayarin iyanunsio.

Kabaleyan, dia tan wadma'd biektaew, man-anunsio ki la ed Balon Silew. Naipaamta
ta'y gagaween yo, produkto, odino serbisio, akatolong ki ni ed Balon Silew tan
ed pamabulaslas na koritan tan salitan Pangasinan. Saray man-anunsio et walay
sakey ya kopia da na Balon Silew ya diman pimmaway say anunsio da.

Para'd labay day man-anunsio, ipawit yo'y kaokolan ya naamtaan ed
balonsilew@yahoo.com.

Magnayon lawas so salitan Pangasinan.

Erwin S. Fernandez
Pangolon manangikurang
Balon Silew

Korespondiente para'd Balon Silew

Pian naibilang saray aktibidades na kaluyagan ed arom ya pasen ed Pilipinas
tan diad biektaew, kekerewen na Balon Silew saray nayarin
korespondiente na magasin ed Ibali (Manila), Tarlac, Laguna, Saudi Arabia, Canada, Estados
Unidos tan arom ni ran ag abitlan lugar. Say kimey na korespondiente et
mangisulat ya 500-kataga ya balita ed lugar to ya nipaakar ed Pangasinan (totoo,
agawa, moyongan (organisasion) tan antokaman). Ipawit soy ngaran tan arom ni ran impormasion ed balonsilew@yahoo.com.

Erwin S. Fernandez
Pangolon manangikurang
Balon Silew

Tawag na pangisumiti na artikulo para'd Balon Silew

Kekerewen saray sumusulat ya mangisumiti ray anlong, antikey ya
tongtong, balita tan salaysay. Say pangisumiti et aliwan garantiya na
panangipalapag na saray artikulo. Onsaral ya ed tutul na pangolon manangikurang
tan say ibaga na saray katolong ya manangikurang. Ipawit yo ed
balonsilew@yahoo.com ya ag onlampas na Nobiembri 22.

Erwin S. Fernandez
Pangolon manangikurang
Balon Silew

Salaysay nipaakar ed miting na Balon Silew

Nen Oktubri 24, masakbayak ya nanpa-PSU Lingayen ta pian masakbay ya nasumpal so miting. Akasabiak ya 8:10 na kabuasan. Balet naigapo so miting na 11 na kabuasan ta inalagar niray arom ya kabiangan. Wadman la ya 9 na kabuasan si Madam Elnora Dudang ya maistra ed PSU.

Saray apantongtongan:

1. Say tima na ontumbok ya paway na Balon Silew (Hulio-Disiembri 2009) et say administrasion nen Gobernador Amado T. Espino Jr.

2. Say pangiuksoy na ortograpiya na saray artikulon onpapaway ed Balon Silew ed panamegley na panangipalapag na "Saray Ganggan nipaakar ed Balon Ortograpiya na Balon Silew."

3. Say pangilukas na Balon Silew ya bolong ed Bolinao tan Iloko.

4. Say reorganisasion na liderato na Balon Silew:

Pangolon manangikurang: Erwin S. Fernandez
Katolong ya manangikurang: Jesamyne Diokno (balita), Santiago Villafania (anlong), Sergio Bumadilla (antikey ya tongtong), Melchor Orpilla (kopia)

Saray sumusulat: Elnora Dudang, Catalina Felicitas, Napoleon Resultay, Melanio Malicdem tan arom ni ra

Manag-uksoy (talintao tan nengneng na magasin) Marino Repalda

5. Say pangipawitan ya amin ya artikulo: balonsilew@yahoo.com

6. Saray tima ed saray ontumbok ya paway:

a. Iniro-Marso 2010 - Saray Simbaan ed Pangasinan
b. Abril-Hunio 2010 - Saray Masansanting ya Pasen ed Pangasinan
c. Hulio-Setiembri 2010 - Panagparles na Panaun ed Pangasinan
d. Oktobri-Disiembri 2010 - Kikiew tan Tantanaman ed Pangasinan
e. Iniro-Marso 2011 - Sira-sira ed Pangasinan
f. Abril-Hunio 2011 - Saray Manok ed Pangasinan
g. Hulio-Setiembri 2011 - Saray Industria ed Pangasinan
h. Oktobri-Disiembri 2011 - Tradision ed Inkianak ed Pangasinan

No sarag ya gaween ya kada duaran bulan so paway na Balon Silew et marakep.

7. Pamaakaran nipaakar ed pangalay pondo ta nababalang so pondo na Balon Silew:
a. Pankerew ya tolong pinansial ed saray pilantropo.
b. Saray anunsiyo ed Balon Silew ya itdan say makakerew na 20 porsiento na loob na sakob ed arapan: P 1200 (boo), P 600 (kapaldua), P 350 (kapat); ed loob na sakob ed beneg: P 1200 (boo), P 600 (kapaldua), P 350 (kapat); tan beneg ya sakob: P 2000 (boo), P 1000 (kapaldua), P 500 (kapat).

8. Saray naitdan ya betang nipaakar ed administrasion nen Gob. Espino:
a. administrasion - Catalina Felicitas
b. bilay nen Gob. Espino - Elnora Dudang
c. bilay tan kimey nen Bise-Gobernador Agabas - Jesamyne Diokno
d. Nipaakar ed Agew na Pangasinan - Melchor Orpilla
e. Saray nagawa no Agew na Pangasinan (Nobiembri 13) - Nap Resultay
f. Komiks - Jesamyne Diokno

9. Say kasampotan ya agew ya pangisumiti na artikulo tan arom ni ran sulat (anlong, antikey ya tongtong, balita, salaysay): imbis ya Nobiembri 15, gaween lan Nobiembri  22.

10. Pangiyanap ya mamura balet de-kalidad ya pangigalutan na Balon Silew

Asumpal so miting ya 4 na ngarem. Salamat ya daakan ed kinen Madam Dudang ed pangiwi to'd sikami legan wala kami'd lugar da.

Erwin S. Fernandez