Nen sinunggay toy tradisyon: Si Dr. Honoria Acosta-Sison (1887-1970), say unaan ya doktora ya Pangasinense tan Pilipina tan say “ina” daray obstetrisyan ed Pilipinas

Nen sinunggay toy tradisyon: Si Dr. Honoria Acosta-Sison (1887-1970), say unaan ya doktora ya Pangasinense tan Pilipina tan say “ina” daray obstetrisyan ed Pilipinas

 

Erwin S. Fernandez

 

Natan ya Marso so bulan daray bibii ed Pilipinas. Ompan igalang iray bibii na luyag na Pangasinan, nanpiliak na sakey a biin Pangasinensen nepeg ya naamtaen daray tubonbalon Pangasinense, iray kalangweran pian ontan manmaliw sikaton panmadmaran da. Sikato si Dr. Honoria Acosta-Sison a niyanak ed baley na Calasiao nen 30 na Disiembre na 1887.

Nen gelew sumpad España nen taon iray 1896 anggad 1898, melag nin ugaw sikato balet nanaral ed eskuelaay parad ugugaw ya bibii ed Pangasinan ta nen saman sananey so eskuelaay ugugaw a lalaki ed saray ugugaw a bibii. Saya agawa nen nanayam si Honoria ed Dagupan nen inatey so ina ton si Doña Pastora Dizon, ed kulaay kanayon na ama ton si Don Macario Acosta y Sison. Sikaton nanaral ed Colegio de la Nuestra Señora del Santísimo Rosario daray madren Dominikano ed Lingayen kasumpal ton nanaral ed eskuelaan daray bibiin ugugaw ed Dagupan. Say ibabangat da nen saman et salitan Español ed panamegley na salitan Pangasinan. Walaan ira ta si Don Macario so kapitan daray baloto ya onbabaroy manlapud Dagupan anggad Manila tan akanggaway pigaran dalin ed Dagupan.

Sinmabi ray Amerikano. Lapud ag labay daray Pilipinon manpaidalem ed saray balon mananamsam odino kolonyalista, agawa so bakal ya tatawagen ya bakal na Pilipinas tan Amerika (Philippine-American War). Kasumpal to ya, nanlinkor ya maestra legan manaaral na salitan Ingles. Nen panaoy Amerikano, walaay pamaakaran ya nayari kan manaral ed Amerika ya so gobierno na Amerika ed Pilipinas so manggastos ed amin ya pankaokolan mo. Saya so tatawagen ya pamaakaran ya pensionado. Pian napili ka ed sayan balibalin programa, kaokolan mon onpasa ed malet ya kompetisyon daray kandidato. Nen 1904, walay 357 iran akibiang ed saya et si Honoria tan sakey nin Pangasinense ya si Luisa Sison so duaran bibiin apili ed sampluran akapasa.

Lapud saray nanenengneng to ran kagagawa ed saray bibiin malukon ed Pangasinan ya ag ira manpakonsulta ed saray doktor a lalaki kanian dakel ed sikara so onpapatey no mananak la ra tan no abilay met ira ag da amtan asikasoen iray kapanyanak ya ugaw ta nen saman say maslak ya ondadago ed sikara iray manamianak, pinasya ton manaral na medisina anggano say ama to tan saray kanayon to ag ira onabuloy ed sayan plano to lapu kasid pananisia ya iray bibii ag onsarag ed saray propesyon daray lalaki. Nen wala lad Estados Unidos ed Pennsylvania, sinumpal toy aral to ed sekondarya ed Drexel Institute tan Brown Preparatory School antis ton nanaral na medisina ed Women’s Medical College of Pennsylvania (saya natan so Drexel University College of Medicine). Nen manaaral ed sayan kolehiyo, tinumangan da na premio ed Anatomiya likod ed saray atatagey iran marka ed saray asignatura to. Nanmaliw nin pangolon manangikurang (editor-in-chief) na Filipino Review, say palapagan daray estudianten Pilipino ed Amerika. Nen 1909, asumpal toy inkadoktor to tan initdan day pankanawnawa ya manaral na sakey taon na obstetrics ed maternity hospital na kolehiyo to.

Sinmempet sikato nen 1910 et akaloob ya full-time ya assistant ed obstetrics ed Saint Paul’s Hospital ed Ibali no iner mantatrabaho met si Dr. Antonio Sison, sakey ya doktor tan pensionado met a Pangasinense ya abayag to lan kabat manlapud inkaugaw to. Ed satan ya taon lamlamang, sikara Honoria tan Antonio et nankasal. Diad ontumbok iran taon abendisionan iray taluran ilalak. Legan mantatrabaho ed sayan ospital, nansulat tan angipalapag si Dr. Acosta-Sison na artikulo nipaakar ed panag-asikaso daray malukon antis tan kasumpal ya pananak (prenatal tan postnatal care). Bilang siyentipikon doktor, saya so gaween to – mankorit na saray artikulo nipaakar ed espesyalisasyon to anggad impansulat to na sakey ya libro nipaakar ed panag-asikaso ed saray kapanyanak ya ugugaw, say sankaunaan ya libro ya insulat na sakey a doktor ya Pilipino. Nen 1912, linmoob sikato ya bumabangat ed University of the Philippines College of Medicine tan nantrabahon doktor ed Philippine General Hospital. Kaiba toy asawa ton si Dr. Antonio, inpursigi ra so pangiletneg na Department of Gynecology ed UP College of Medicine ya agawa nen 1922. Anggano okupadod trabaho tod ospital, walay tiempo ton angimbento na saray kagawaan ed obstetrics. Sakey ed saraya so sagittal pelvimeter.

Nen walad Europa ya binisita to ray ospital ya moderno ed saray siudad na Berlin, Dresden, Vienna, Paris, London tan Dublin ed loob na siamiran bulan, naimatonan to ray operasyon ya tatawagey laparotrachelotomy. Inawit to yan kalasin operasyon ed Pilipinas kapawil to et agawa so sankaunaan ya operasyon ed lapag na bansa. Nen dekada 1930, ag tinmondan nansukay tan angipalapag na saray artikulo ed obstetrics tan gynecology tan sakey a libro, Obstetrics for Nurses; saya pinmaway nen 1936. Pian natulongan to ray bibiin makatalos nipaakar ed abig ya laman da, panag-asikasod saray ugugaw tan pamilia tan arum ni ran bengatla, nankorit sikato ray salaysay ed abeban paliwawa ed saray magasin tan talagew na lapag a bansa. Diad ontumbok iran taon antis na Kumaduan Bakal a Sankamundoan (World War II), sikato so nibakin ondago ed saray konperensya daray doktor tan siruhano ed biektaew. Nen 1940, initdan na Philippine Women’s University sikato na Honorary Doctorate ed Siensia.

Legan walay giyera, nantuloy a nanlinkor si Dr. Acosta-Sison ed Philippine General Hospital tan diad UP kaibad saya so pansukay to nipaakar ed chorioepithelioma anggad nanmaliw ya propesor tan ulo na Department of Obstetrics tan propesor na gynecology. Ed chorioepithelioma, si Dr. Honoria ed salita nen J.P. Greenhill, say akansulat na libron Obstetrics, so “sankamaungan ya autoridad ed mundo” ed sayan tema. Lapud sayan pansukay, binirbir da so kimey to na Philippine College of Surgeons nen 1954 ed impan-iter da ed sikato na tumang (award). Nen 1946, sikato so kabiangan a pundador tan unaan ya pangolo na Philippine Obstetrical and Gynecological Society. Say nansumpalan ton kolehiyo ed Amerika so angisabit ed sikato na Doktor ed Siensia, honoris causa nen 1950. Nen 1955, naitday dayew na gobierno nen Pangolon Ramon Magsaysay na Presidential Award.

Kasumpal na 45 taon ya impansilbi ed UP, inpabtang da ed sikato so professor emerita na obstetrics tan gynecology. Nen 1957, say UP College of Medicine angiter ed sikato na sertipiko bilang “honorary alumna”, sakey a pamabirbir ed baleg ya kontribusyon tod medikal a panagbangat. Nen inimbitaan na Pangasinan Medical Society ya mansalita ed sikara, linma ed Dagupan nen 1957. Anggano retirado la manlapud 1955 anggad 1968, intuloy toy pansulat tan panbasa na saray asukayan to ed saray konperensya na nanduruman ulopan daray doktor tan iskolar dia tan ed biektaew legan manbabangat ni ed UP. Nen mantaoy 80 labat sikato tinmonda.

Diad dunong tan koli to, si Dr. Honoria Acosta-Sison so sakey a biin Pangasinensen kaokolan ya pigalangan tan aligen aliwan si Urduja ya abayag lan nipatnag ya aliwa sikaton Pangasinense no ag ingen nanlapud Indochina (say tatawagey Vietnam natan). Nen panaon nen Dr. Acosta-Sison, ag da kabat a balot si Urduja lapud si Urduja linmesa labat nen tiempo daray Amerikano – nen 1916, 1923 tan 1924 – aliwan nen uley daray Kastila. Kanian ibantak ed basuraan si Urduja, ikinon si Dr. Honoria Acosta-Sison!

 

Iray Reperensia

Curriculum vitae nen Dr. Honoria Acosta-Sison. https://drexel.edu/medicine/about/diversity/diversity-blog/the-mother-of-philippine-obstetrics-honoria-acosta-sison/ <inakses nen 27 na Marso na 2023>.

Honoria Acosta-Sison 1887-1970: First Filipina Physician and Mother of Philippine Obstetrics. Scientists in the Philippines. Vol. II. Manila: National Science Development Board, 1975. Nengnengen met so http://www.oocities.org/scientists_phil/

Mother of Philippine Obstetrics: Honoria Acosta Sison. https://drexel.edu/medicine/about/diversity/diversity-blog/the-mother-of-philippine-obstetrics-honoria-acosta-sison/ <inakses nen 27 na Marso na 2023>.

Nipaakar ed talintao. Si Dr. Honoria Acosta nen marikit ni tan walad Amerika (Inaon ed The Filipino I (4-5) 1906).