M.A.N. tan say aso nen Uncle Sam

Mankoritak na sakey ya artikulo nipaakar ed MAN (Movement for the Advancement of Nationalism). Natan manaya (o nen karuman ta manpasado alas dose la) so anibersaryo na inkianak na Partido Kumunista na Pilipinas nen Jose Ma. Sison ya agew na inkianak met nen Mao Tse tung.

So MAN et inletneg nen Pibriro 7-8, 1967 nen agawa so unan tulagan da ed National Library ed Manila. Inbana da ed anibersaryo na inkianak nen Claro M. Recto, say maltaw ya nasionalistan senador ya inatey nen 1960.

Abasak lay pigaran litiratura nipaakar ed MAN. Siempre wadia'd siak so dokuminton primaria: say koleksion na unan kongreso tan say risulta na mikaduan kongreso nen 1969 ya sakey ya paliwawa ed posision da ed kipapasen na baley tayo nen dekada sisenta. Say pangulo et si Ferdinand E. Marcos ya nanlapud Amerika nen Setiembri 1966 ya angiter na simpatia'd si Pangulon Lyndon B. Johnson nipaakar ed golon nalmuan dad Vietnam. Si Marcos, kuanen Johnson so too ton napanpiaan na Amerika ed Asia. Sayan diklarasion balet ag agustoan na saray istudianten radikal, saray aktibista ya malinew ed sikara so ginawan panbisita nen Marcos - panagdildil ed sapatos na akankien na White House.

Labay kon talosan no anto ray agawan sakbay na impanianak na MAN. Amtak ya baleg so papil nen Recto, katon kaokolan ya talosan so dekada sinkuenta. Biig nid satan, say nagagawa ed paway na bansa, say bakal ed Vietnam. Anto ni? Say panag-usig ed saray propisor na UP na CAFA (Committee onAnti-Filipino Activities) ya sakey ya manipestasion na panagbusol ed saray ibabagaran kumunista nen Marso 1961 angidalan ed protista na saray istudiante. Sakey ni so pibabali na Amerika ed nagagawa diad Pilipinas, diad bilay na baley - pulitika, ekonomia tan kultura. Sakey so pamapaltog ed saray Pilipino ed paway na basi militar ed Clark so angigapo na petang na olo tan pasnok na Pilipino laban ed lames na Amerika ed Pilipinas. Nen atakuatan da ya anggapoy nagawa na Pilipino ed sarili ton bansa nipaakar ed samay akankasalanan, angiter ed kanonotan na dakel so tepet no anto so kakanaan na kawayangan. Paelek-elekan so Pilipino ta anggano diad paway na bansa say nengneng da ed Pilipinas et sakey ya matoor ya aso nen Uncle Sam.

Getma na MAN ya tiponen amin ed sakey ya ulupan saray totoo ed pulitika, ekonomia, edukasion, midia, saray dumaralos, saray sientista, saray istudiante, saray bibii tan arom nin miembro na baley ya walay poso ra so pamabulaslas na bansa. Anggano ag binmayag ta akasabi labat ed mikaliman taon to, panon makana so kontribusion to ed awaran na galaw na karaklan ed Pilipinas? Saya tan arom nin tepet so gabay kon ebatan ed sayan salaysay.