Say panagrikisa ed asawa nen Bo Xilai: Tanda kasi na riporma ed Tsina? (The trial of Bo Xilai's wife: Is it the signal for reforms in China?)

Diad siudad na Heifei ed probinsia na Anhui ed Tsina agawa so panagrikisa ed si Gu Kailai, say asawa nen Bo Xilai ya nanpatey ed sakey ya Briton ya padisir dan sakey ya ispiya. Akakapot ed mata tan layag daray pumapalapag, sayan pamasubok et bibirbiren dan mangibawag na abayag lan aalagaren ya riporma ed politika na Tsina.

Walay malinew ya ibidinsiya kontrad si Gu ya sikato so nanpatey ed si Neil Heywood. Say ibabagan rason no akin agawa ya et lapud kwarta. Si Heywood so ibabaki nen Gu ya mangipawit na kuarta to ed abroad. Say suspitsa da et pinatey to lapud gabay na Briton so baleg ya porsiento.

Walay sananey nen anggulo. Ibabaga da ya si Heywood et sakey ya ispiya et no ontan et ipapanengneng to ya sakey ya traydor ed Tsina si Bo Xilai. Si Bo et maltaw a kabat ya maseseg ya makabaley et no tugtuwa ya, sakey sirin sikato ya dobli kara: nasyunalista no kabuasan, migagalaw ed saray espiya no labi.

Say analisis nen Francesco Sisci et, ya manlapud Inglis ipatalos kod Pangasinan, onya: "Sakey ya lupa daray agawgawa ya aga nipaway ed panagrikisa ed si Gu Kailai diad patey na sakey ya bibirbiren dan ispiyan Briton so mangiyan ed asawa ton si Bo Xilai, say alaos lan palbayani na makabalon-Mao ya arapen na Tsina,  ed kipapasen na sakey ya kontrad-Oeste ya makabaley ed kabuasan tan mimila ed saray kabusol to no labi. Tugtuwa o andi, sayan padisir et duga lan mandiral ed saray nasyunalista tan isugiri to so pamasimbalo ed debatid politika. Say ikolong nen Gu Kailai et nayarin mangiter na selyo ed tutul ya igapo la so abayag lan aalagaren ya reporma ed politika."