Say ebat nen Corona ed impeachment complaint

Diad samay ebat nen Corona, wala iray abistaan ko ran lingo. Ipapanengneg to ya pinekewet daray abogado nen Corona say sakey ya artikulo.

Saya so insulat kod sakey ya palapagan bilang kominto:

Kindly read the soon-to-be-published article by Laarni Escresa and Nuno Garoupa as cited in the Corona answer to the impeachment complaint. It seems that Corona lawyers did not read the proviso that it cannot be cited nor quoted. More grievous is the fact that they maliciously used the authors to support their claim that in no way was Corona partial to GMA when in reality table 2 of the study, Corona registered 14 pro-GMA votes and 5 anti-GMA or 74 % pro-administration, NOT 8 pro-GMA votes and 28 anti-GMA votes or 29 % pro-administration as given in the answer. On the other hand, Carpio registered 11 pro-GMA votes and 9 anti-GMA votes or 55 %  pro-administration, NOT 19 pro-GMA votes and 11 anti-GMA votes or 66 % pro-administration as alleged in the Corona rebuttal. Brion had a 100 % pro-GMA votes as he casted 2 votes and 0 vote anti-GMA, which is in full contrast to the Corona reply that Brion had 5 pro-GMA votes and 8 anti-GMA votes or 33% pro-administration. Authors also conclude that, my apologies to the authors, "Perhaps aware of the crucial role by the Supreme Court and the Chief Justice, she [GMA] appointed individuals within her circle of influence. She appointed three chief justices and ignored the tradition of appointing the most senior twice. She bypassed Puno over Panganiban in 2005 and bypassed Carpio over Corona in 2010." You can download this at http://www.law.illinois.edu/_shared/pdfs/Philippineproject20101110.pdf.

 

 

 

 

Anto so formula nen Sendong ya amatey na 1500 ya totoo?

Say inkalabes na agawa ed Cagayan de Oro tan Iligan ya angitilak na makapataktakot ya inkidiral tan patey et walaay formula.

Say gross incompetence nen PNoy iyarum dia so inkakapoy na NDRRMC ya papangoloan nen Benito Ramos + iray lokal ya opisiales na CDO tan Iligan ya onoogip ed pwisto tan masiban minanabang ed "lagay" ya iiter daray illegal logging companies + iray makapal so lupa tan ganid ya operator na illegal logging activities ed Lanao x inkamureng tan inkabenger daray totoo diman = trahidya nen Sendong.

PDEA Region 1, angkekelag so eerelen da

No gabay na PDEA Region 1 ya patondaen so lakoan na droga, say erelen da komon iray bigtime ya pusher, iray drug lord ya kuan.

Natan no labay dan ondakel ni so drug addict, erel day smalltime ya pusher. Itilak da iray managgaway droga, iray drug lord.

Ag onaligwas so drug trade no iray manooley ed barangay, baley tan probinsia et ag da aboloyan iraya, no aga ira nasasaliw na kuarta tan no say nononoten da say tugtuwan iyaligwas na baley.

Aliwan "safe place to live in" so Pangasinan lapud saray pateyan

Aga napatonda na PNP Pangasinan so pateyan ed luyag. Sikaton aliwan tugtuwa ya "safe place to live in" so Pangasinan.

Inutil so PNP ya anggapo so naeerel dan totoo ed likod darayan pateyan. Akin kasi?

1. Makapoy iray omiimbestiga.

2. Onoogip ira ed trabaho da.

3. Kulang so totoo da ya itatayak ed binaleybaley ta pian nasebel iray totoon walay getma dan aliwa. Saya so police visibility.

4. Iray riding-in-tandem et miembro lamlamang na polisya.

Say padisir ko, saksakey so ababangan dan riding-in-tandem ya amatey ed saray pinatey da. No onia kaokolan ya aralen ya maung so  kada kaso pian naerel sayan riding-in-tandem ya kriminal.

No akin useless iramay lugan ya inter na gobierno na Pangasinan ed saray bokal

Unaan dia et dakel ni sansia so aga makakaatindi ed session da ed kapitolio ya maminsan labat ed sakey simba.

Initdan iray luganan pian ag lamlamang ira onloob ed session hall.

Asayang so kuartay baley.

Kaokolan ya ipawil daray bokal irayan luganan.

Talagan ag kaokolan ya itdan iray luganan lapud ipapanengneng to ya say panagbenben ed pwisto et walaay katupag to ran pribilihiyo.

Si GMA, inlugan da komon ed chopper ya inlako da ed PNP

Makapalek si Gloria Macapagal Arroyo tan say administrasion nen PNoy. Ikolong da la et makapandemand ni ya ambabangil. Si PNoy met iter lan iter.

No labay dan ilugan ed helicopter, akin kaokolan sikaton onabuloy? No walay biskeg nen PNoy, akin onsabi nid dakel ya tongtongan tan oras ya naabak?

She could have been forced to ride that chopper. Mas masanting komon no say luganan ton chopper amay inlako nen Mike Arroyo ed PNP. Then, that could be a beautiful twist of fate. Inlako day chopper pian luganan dan sanasawa lamlamang ed pangikulong dad si GMA ed Veterans.

National Library of the Philippines vs. National Library Singapore

Ipara tayoy National Libraries na Pilipinas tan Singapore [Let us compare the National Libraries of the Philippines and Singapore]:

NLP

Akalukas so reading room da 8 na kabuasan anggad 8 na labi no Lunis anggad Biernis labat ta no Sabado akalukas na 8 na kabuasan anggad 5 na ngarem [Their reading room is open at 8 am to 8 pm from Monday to Friday only because on Saturday they are open at 8 am to 5 pm].

NLS

Akalukas na 10 na kabuasan anggad 9 na labi no Lunis anggad Simba [They are open at 10 am until 9 pm, Monday to Sunday].

Diad sayan Christmas vacation [During the Christmas vacation]:

NLP akakapot na Disiembri 16, 17, 21 (mankapot na 12 na ngarem), 24, 26, 27, 28, 29, 30 tan 31 [NLP is closed on December 16, 17, 21 (will close at 12 pm), 24, 26, 27, 28, 29, 30 and 31].

NLS akakapot labat na Disiembri 24 (mankapot na 5 na ngarem), 25, 31 (mankapot na 5 na ngarem) tan Iniro 1 [NLS is closed on December 24 (will close at 5 pm), 25, 31 (will close at 5 pm) and January 1].

Antoy nibaga ed sayan inpaduma da [What can one say with their difference]?

Nayarin dakel so nibaga to ed kultura na panagbasa tan panagsukay ed duaran bansa. [It might say many things about culture of reading and research in both countries.]

No akin inyagel nen Miriam si Corona

Diad tongtongan dad tilipono:

Renato Corona: Kumusta lay kampanyam parad International Criminal Court (ICC) ditad Nueba York, Miriam?

Miriam: Maung met, Chief Justice.

Renato Corona: Manaya, wala iray totoon mangibabaga ya man-inhibitak kono. Amtam ya inkampanyaan ta ka nen Oktubri nen inmatindiak ed mika-24 ya tulagan daray okom ed Prague, Czech Republic.

Miriam: On, amtak itan. Baleg ya salamat ed sayay ginawam Chief Justice. Ag ka mapaga ta diad ontombok ya  agew mangiterak na press statement.

Binay ya agustoan to lay manpasiar ed Tsina

Anak na lasin Binay ya gabay to lamet ya onla ed Tsina.

Is it our national interest to stop the execution of a Filipino drug trafficker?

Anggapo la so agawaan mo, Binay, nen linma kad man nen bitayen da lamet so Pilipino. Tan kuan mo ya inopot lan amin so polaing ta piano natolongan yan Pilipino, akin ta labay mo ni so onla la lamet ed Tsina?

Naabak so pondo na gobyerno ed sayan  anggapoy kakanaan ton ipikal nen Binay ya ag komon  natoloy.

No aboloyan nen PNoy ya, pariho iran ag abangatan.

De Lima, do your job first sakbay so Sinado

Anggano onabuloyak ed ginawgawa nen Leila de Lima  bilang manooley na dipartaminto na katunongan, mankimey ni sikato sakbay ya mannonot ya onbatik ed Sinado.

Sakbay ya manparaan ya onbatik ed Sinado, resolve first the Maguindanao massacre, the Vizconde case, the plunder case and electoral sabotage case against Arroyo. No ag mo nasumpal yan risolbaen ed loob na betang mo ed dipartaminto, ag ka nayarin onbatik ed Sinado.

No  gagaween mo iraya ta pian onbalingit so ngaran mod onsabin iliksion, maung nin manresign ka la natan!

Say kaokolan na baley natan iray totoon ag manpipilalek ed isabiy grasya no ag say tugtuwan iyaliguas na baley!

Nakaokolan ya ikalen si Renato Corona!

Anggapoy katunongan no walad betang na Korti Suprima si Renato Corona.

Diniral toy galang na Korti Suprima ya miparis odino ag miampar ed inkalabes ed agawa nen panaoy Martial Law.

Ya say lupa, walna, tan ngaran to et mangiimbitan ayewen so Korti Suprima lapud kagagawa to.

Anggad wadtan sikato tan iray pitoran okom ya benben ed beklew nen Arroyo, ag nailaloan ya onkurang so hustisya.

Lapud saraya sirin, say baley ya Pilipino kaokolan ya mankakasakey ed  kanonotan ta pian naikal si Corona.

Ikalen si Corona!

Balet sayan nagagawa ed Korti Suprima et walay sengeg to ed si Hilario Davide tan si Artemio Panganiban. Si Davide so nanpasamba ed si Arroyo ya nen nanritiro et ginawa dan ambassador ed UN. Si Panganiban so angibagan "bakanti" so posision ya intilak nen Estrada ta piano manmaliw sikaton chief justice. Irayan okom so angiter na padir na ley ed piki, aliwan tugtuwan inkapangolo nen Arroyo.

Arroyo mankuakuanan ya mansasakit; labay toy ontaynan ta pian ag la onpawil

No sakey ya too labay toy mansakit, say laman to onabuloy. Sakey si Arroyo ed sarayan totoo lapud natatakot ed isabi na agew ya pamadusad sikato.

Nen asingger da lan ipokok ed pangawan si Arroyo aliston inmabig. Say kuanday abogago ton Lambino ya sarag to lay onsempet ta diman lad abung da manpakasil. Sakbay to ya labay to ya onlad abroad ya manpatambal kono.

Imbis ya hospital arrest, house arrest lay gabay da.

Kabebegta nitan la lamet so balita ya kaokolay iyakar ed ospital ta sinmigi lamet so sakit nen Arroyo.

Natan ta onpawil ed ospital, say labay da langula anganko et hospital arrest?

Irayan doktor na St. Lukes paelek-elekan ira.

Unaan lapud ag da sarag ya polaingan so sakit nen Arroyo, kaokolan sikato ya onlad biektaew ya mangipapatnag na inkakapoy daray doktor na St. Lukes.

Mikadua, onaabuloy ira ed katilaan nen Arroyo ya kaokolan toy manpanengneng ed abroad anggano andi ya sebel ed itika  na inkadoktor.

Nitan met si Miriam Santiago tan Gregorio Honasan ya angibitla iray sangkamurengan ya balikas ya kaokolan konon itday galang si GMA sikaton nepeg labat so house arrest aliwan diad kolongan.

Anggapoy nailaloan ya onpaway ya maong ed sangi nen Honasan lapud sakey sikato so walaan ya baleg a kasalanan ed baley. Makapakelaw no akin ta analon sinador nen saman tan natan. Lapud inkamureng daray bomobotos.

Nipaakar ed si Santiago, diad padisir ko, gagawen ton mureng iray Pilipino. Sakey ya maronong ed ley ya uusaren to ta say nonot to mureng iray Pilipinod ley. Bantiwel!

Department of Sports tan Philippine Sports University

Diad kasumsumpal ya SEA Games, ipapatnag ton kaokolan lan ikalen so Philippine Sports Commission san iletneg so Department of Sports, odino Dipartaminto na Pakasilan.

Mibiang so sayan dipartaminto ed saray pamaakaran ed pakasilan na DepEd.

Diad dalem na sayan dipartaminto iletneg so Philippine Sports University (PhilSU) ya mangiter na scholarships ed saray istudyanti ya so kanonotan da walad pakasilan. Igapo so training da irayan akaloob ed iksamin diad kinder. Mangiletneg na Philippine Sports Village ya pangipalageyan na PhilSU ed paway na Metro Manila. 

Wala iray mini-Philippine Sports Village ed kada rehiun. Singa diad region 1, ngaranan ya Pangasinan-Ilocos Sports Village ya nayarin iletneg ed Urdaneta.

No naigapo la irayan kanonotan diad sampluran taon, itarya la so pangi-bid na Olympics no 2024.

Lawas kan pinabli

Pinmaway ed Cinemanila 2011 nen Nobiembri 16. Onsabid Dagupan no Pibriro 2012.

                 

On analoy Pacquiao!

Bawien koy inbagak. Analon tua si Pacquiao.

Sikatoy tugtuwan kampion!

Unong ed arum, sikato so naynay ya onaarap ed si Marquez imbis ya si Marquez ta sikatoy challenger.

Tan ag to gagatinan so sali na kalaban, aliwan singad si Marquez.

Manasinggeran irad puntos balet unong ed saray okom si Pacquiao so analo.

Parad saray Mexikano tan iray fans nen Marquez ya aliwan Mexikano, kaokolan dan awaten ya.

Iray kasalanan daray Cojuangco-Aquino

Iray kasalanan na pamilya Cojuangco tan Aquino et ginmapo nen tinakew da so pondo na gobierno nen Aguinaldo - say kuartay baley sirin - ya inpansaliw day dakel ya dalin, say azucarera, tan say Hacienda Luisita ed Tarlac.

Dakel so pinapatey daran totoo ed pyudal ya binaleybaley na Tarlac ya say katawan da et iray pamilya Cojuangco tan Aquino.

Nen agawa tay Hacienda Luisita massacre, inolit day agawgawa nen 1960s nen pinapatey daray akandalin na dalin ya ginamgam daray Cojuangco.

Satan ya dalin ed Hacienda Luisita ya inames ed dala daray dumaralos et tanda na inkaganid ed kuarta tan oley daray Cojuangco tan Aquino.

Sakey ed saray amaltog ed saray totoon onlalaban ed dili dan kanepegan et bodyguard nen dati nen Kongrisista ya si Noynoy Aquino. Sikato ni angan ko so bodyguard to anggad natan.

Natan irayan katuaan ag ira pinmaway nen iliksion.  Lapud kasi ed kasil daray Cojuangco-Aquino ya pepetan iray midia na kuarta?

Sikaton atay CARP odino Comprehensive Agrarian Reform Program et sakey ya kabalgan ya lurey ed administrasion nen Cory Aquino ta say Hacienda Luisita et ag inpila ed programa.

Baleg so panduaruwak ed administrasion nen Pnoy aga labat lapud sayan kasalanan da ed totoo na Tarlac ya kabaleyan da ni met. Balet lautla ed saray angkabaleg ya lingo ya nagagawa ed inagew-agew ya batik na oley to.

Natan ag popolianan komon daray anacbanua na Pangasinan ya manari iray Cojuangco diad luyag lautla ta wala lay akaloob ed politika na Pangasinan.

Igagapo da la langula so panaggamgam na dalin ed Bayambang tan arum ni ran baley ed ketegan na Tarlac tan Pangasinan. Ag komon ya paolian na totoon walad oley ed Pangasinan ya mangiyagel ed saray kanepegan daray kabaleyan tin Pangasinan. 

Analoy Pacquiao?

Andi ed pananisiak. Balet nayarin nalilingo ak ta agak met okom na boxing. Saya balet so insulat kod sakey ya artikulo na yahoo.

Kuanko:

Statistics has been doctored. I cannot believe it. Agak manisia. There are more rounds that indicate Marquez got the upperhand. Perhaps my four eyes had me deceived but Marquez won the fight by a very slight margin. Anyway, Pacquiao should better retire or seek another rematch to prove his mettle and stop the speculation that the fight is lutong macao. But with this showing, I doubt if he can really battle it out with gayweather.

How to solve our garbage problem?

Maganon naanapan ya polaing so problima ed basura.

Say ebat ed Solid Waste Management et iter ed saray kompanya so betang ed panagrecycle na antokaman ya basura ya manlapud produkto da.

Alimbawa, iray plastic na shampoo, bareta, sabon tan polbos ya sabon ya panpesak etc. et iter so risponsibilidad na panagrecycle ed kompanya na UNILEVER etc.

Ontan met ed saray arum ni ran basura ya singa karton, lata, plastic ya uusaren ed panagkarga, boti, etc.

Say trabaho na gobierno et ibiig irayan basura ed sakey ya segregation center ed kada barangay ya nigapo lay panagbiig ed saray kaabungan. Koliktaen ya na kada kompanya at makaoley la ran manrecycle ed saray basuran nanlapud produkto da.

Natan iray plastic ya uusaren daray angkelag ya kompanya et onpawil ed samay nanggawa na plastic ta pian sikara so manrecycle.

Ag la kaokolan so sanitary landfill odino incinerator.

Natan iray basuran biodegradable, ukis na antokaman ya bunga, etc., et iray akanbasura so kaokolan ya manasikaso ed mismon kaabungan da.

Ed arum ya salita, say basuran nanlapud produktom, sikay manrecycle. Waste coming from your products should be your own responsibility.

Say Rizal prize

Pian lalon ontagey so pamadayew ed si Rizal diad mika-150 ton taon ya inkianak tan  ta pian milaban ed primyon Nobel ya anggad natan anggapo ni so Pilipinon apagalangan na sayan galang, kaokolan ya niletneg saray primyon Rizal ed siensia, midisina, litiratura, tan kareenan.

Sarayan galang odino primyo et itday pondo na gobierno tan iray kabalgan ya kompanya ed Pilipinas (iray pamilya Sy, Tan, Ayala, etc.).

Anggapoy duaruwa ya say ngaran nen Rizal et mas kaokolan ya pidayawen nen say sakey ya akaimbento ed dinamitan baleg so papil to ed saray kolkolan, giyera ya amatey ed dakel iran totoo ta pian say primyo ed kareenan ya ingngaran ed sikato et anggapoy kakanaan to.

Si Rizal et sakey ya sientista, sakey ya optalmologo, nobelista tan sakey ya manangarod kareenan.

Itandoro si Rizal ed sangkatageyan ya galang ed intiron mundo, atagey ni nen say primyon Nobel, say Rizal prize in science, medicine, literature tan say Rizal peace prize ya lukas ed amin ya poli na talba.

Akin delap? Iray dam operators tan PAGASA et tanga

Delap lamet ed Bulacan, Pampanga tan Pangasinan. Akin?

Diad inkamureng daray dam operators tan PAGASA.

Ag da akoen ya baleg so  ginawa ra ed inpantagey na delap. Inbolos day danum  ed saray kalayan nen atipon lay danum ya insalog nen Pidring.

No onsabi so bagyo ag met tampol. Wala ni sakey odino duaran agew ya onloob ed Philippine area of responsibility. Akin ag da ibolos so danum sakey odino duaran agew sakbay ya onsabiy bagyo?

No ontan walay panaun ya onsoner so danum ed dalin. Natan, no onuran ya dakel no bagyo la, abawasan lay danum ed dam ta pian ag la mangibolos diad mismon agew na bagyo.

Mairap kasi yan nonoten?

No panon ton patondaey korapsion

No labay nen Pnoy ya ontonday panagbolsay pondo na gobierno, so pamadusa ed saya aliwan anggad bilay ya kolong no ag ingen patey ed bitayan.

Natan so pamadusa gaween ya tampol ya walaan balet na due process.

Igapon tampol ya ed saray pamilya Marcos (sangkabalgan ya takew ed awaran na panagtakew ed gobierno), si Ramos (PEA-Amari, Centennial Expo), Gloria Macapagal-Arroyo tan Mike Arroyo (Fertilizer scam, electoral fraud, bribery ya gagamiten day presidential discretionary funds etc.).

Ed arum ya salita, say "plunder" odino say panagsamsam ed kuartay baley et dusaen na patey.

Ipila ed pamadusa so pamawil daray tinakew ya yaman da tan say pangiseblet ed boleg da ed panagbatik ed saray iliksion odino posision ed gobierno.

Iray kangaranan da et ipila met ed sakey ya libro ya mangidalatdat na ginawan panagtakew da ed gobierno ya nayarin pauloan na "Iray makapabaing ya totoon nantakew ed kuartay baley."

Smart-Gilas, inpatalo na kompiansa

Maminsanak labat ya manbantay na basketball lapud laban na Pilipinas ed South Korea ed FIBA-Asia. Walay 11 puntos ya panaegan na Pilipinas ed South Korea no agak nalilingo ed pigaran minuton laban ya asingger lan nasumpal. Sinayang na Smart Gilas lapud kompiansa. Tan dakel ni ran lingo ed free throw ya nayarin makaiter na limaran puntos.

Agi, masamit ya buntalan so lupa da irayan Pilipinon bumabaskitbol.

Suportaan so Palistina!

 Saya so insulat kod sakey ya website:

The Palestinian people had long suffered and still suffering from the abominable conduct of the big powers, the US and the UK, since 1947. The basis for establishing their state should be UN Resolution 242, which means all of Gaza and the West Bank. The Palestinians deserve peace and prosperity but do they deserve Abbas? The Palestinian people must castigate their own leaders and show to the world that they really want a state of their own regardless of what Obama, Israel and Abbas are doing!

Anto kasi so aalageyan na DFA?

Bicycle lanes

Diad Tokyo, nayari mon liberen so Asakusa ya akalugan ed bisiklita ya anggapoy pagam ya ondalan ed kalsara tan mibansag ed saray totoon onaakar. Iray bumibisiklita, akulaw odino masiken, bii o lakin kaolop toy anak tod beneg,  amin ira ondadalan a mainawan makasabid laen da.

Say tanda na sakey ya bansan mainawa so panagbilay et iray dalanan daray totoo ya maawang tan malinis ya atanemay kikiew ya mangiter na sirom.

Satan so Tokyo. Balet diad Manila, arawi ni laen to. No labay tayon miparis ed Tokyo, ed Penang, magano labat.

Irayay lideres tayo, akakar la ra ed arum iran bansa balet singa anggapoy naaaralan dan nipaalagey ed saray baley-baley tayo.

Singa irayay bicycle lanes.

CCP: Panaltalo na konsirbatismo

Say agawan kontrobersiya ed CCP et ipanengneng to so inkamureng daray manpoprotista ed saman ya iksibit.

Saya et panaltalo na konsirbatismo ed tatawagen ya arti.

Iray paparin mimitirol ed saya mamaung nin pibabalian da ni so pikewet ya nagagawa ed loob na simbaan da.

Iyan ed mapa so Pilipinas!

Panon to?

1. Mangiletneg na sangkaatageyan ya paalagey (building ya earthquake-proof) ed intiron mundo.
2. Mangipalagey na sangkarakepan tan sangkadukeyan ya taytay.
3. Manggaway sangkabalegan ya stadium ed intiron mundo.
4. Mangipalagey na sangkabalegan ya publikon ospital ed intiron mundo.
5. Mangipalagey na sangkarakepan, sangkamodirnoan ya airport ed intiron mundo.
6. Mangipalagey iray paalagey ya nabirbir daray totoo ed intiron mundo.
7. Manggaway sakey ya siudad ya balon kapital na Pilipinas ed paway na Manila ya pakanengnengay inkamaong na Pilipino.
8. Mangipalagey na sangkamodirnoan ya doongan.
9. Mangipalagey na sangkamodirnoan ya sistima daray tren ya mankonikta ed Luzon, Visayas tan Mindanao.
10. Mangipalagey na abung daray libro ya sangkarakepan ed disinyo, sangkabalegan ed intiron mundo.
tan arum ni ra.

Ag nayarin nakontento ed wala la. Kaokolan ya mankogkogip ya baleg iran kanonotan ya sarasarag ya gaween.

Asewek ed kalsara

Anggapo komoy asewek ya naangob ed kalsara. Say numiro unon mangiiter na asewek iray jeep, bus tan tricycle.

No labay na gobierno na nabawasay sakit ed bala daray totoo, pabonaen so turismo tan naipasal so panakar, maseseg komon ya ikalen ed kalsara iray luluganan ya smokebelchers.

Marakep ingen no ikalen irayan luganan ya di-diesel.

Manakar no asingger so laen!

Marakep so manakar ed gilig na kalsara no dakel so kiew ed dadalanan tan iray luluganan ag mangipapaway na asewek.

Diad Penang no inerak nansalita ed Decolonising our Universities, anggapoy naangob ya asewek tan dakel so tanaman ed gilig na kalsara.

Marakep so manpasiar aliwan singa dia ya so labay da et simintoan so amin ya dalin ta pian no onuran delap so onsabi.

Kaokolan ya ibangat iray totoo dia ya manakar ta anggano asingsingger so akaran da onlugan ni ra.

Akatipid kad pasahi no manakar ka. Niusar mo ni salim ed panakar.

No marakep so panakaran, mainaway manakar. 

Aliwan Phl balet RP

Mankelawak no akin inbelyaw nen Prisidinti Noynoy ya kaokolan ya usaren lay "Phl" imbis ya "RP" ya abayag lan uusaren.

Akin tumbo-tumbok tayo ed ibaga daray arum odino diad pamadmaran ya insaklang daray arum ya singa ISO?

Say "RP" alenleneg ya pinatekey a ngaran na ripublika na Pilipinas. 

Maliket ya inkianak ed sika, Palbayani Jose Rizal (1861-2011)

Maliket ya 150 taon ya inkianak nen Rizal, say ama na bansan tatawagey Pilipinas.

Maliket met ya agew daray ama!

Gaway Pilipinas so Spratly Islands!

Oras la ya so Pilipinas ontalindeg ed panaariarian na China ed dalin ya gawa tayo.

Atapis so headline na Philippine Star ta nen karuman so headline to "China scolds Phl over sea dispute."

Akin popolyanan tayo ya sikatayo ran Pilipino dia so nengneng tayo ed China et sakey ya toon maton ya sarag ton aldabisen iray Pilipino?

Akin aga "Phl defies China, asserts claims at UN"?

No onia sananey so pakatalos to ta sikatayo so maneegna no antoy gabay tayon nagawa, aliwan iray Intsik.

Makapoy so ipapanengneng na saray palapagan dia. Kaokolan ya sikatayo so manbenben ed antokaman ya gabay tan panmaongan tayo, aliwan akadepende ed arum ya totoo tan bansa.

Marcos ed Libingan ng mga Bayani

Iponpon lay Ferdinand Marcos ed Kamposanto daray Palbayani.

Antoy inpanduma nen Marcos ed arum ya naiponpon diman? Iray arum ya naiponpon diman et kapara to lamlamang ya korap.

Akin pababalegen ti ni ya ya singa si Loida Nicolas Lewis?

Iponpon lad man si Marcos kaibay arum ya pikewet ya nanoley ed bansa.

No akin ag labay na simbaan ya ipasa so Divorce Bill?

Ag labat lapud doktrina na simbaan.

No naipasa so ley, onkapoy so pakapanyari na simbaan diad bilabilay na totoo.

Onlad amin lay pibibiang ed istado.

Itandoro so ley

Say sengeg na kolkolan, siblangan, sangsangan et no ag natotombok so ley.

No wala kad katunongan, tomboken ya kaokolan so ley.

Balet wala iray matatakken ya ag da amta so ley. Pilalek da nin pekeweten so ley.

Diad kasampotan, say ley so mangipetek ed sarayan kaugsan.

Iray matakken ya kaokolan ya leweten

Say inkamatakken aliwan naynay a pakanengnengan na inkasilib.

Wala iray matakken ya mangipapatnag na kaugsan ya aliwan maung a panmadmaran. Balet naynay iran ondadago ed simbaan a manpipikasi odino mangiyoolo na muyongan daray managpikasi.

Antoy tawag ed sikara?

Katuaan vs. Katilaan

Say katuaan so manaltalod katilaan.

Saray Ford ya luganan tan say abalang ya dayew na Espino administration

Ag kaokolan daray bokal saray kotsi lapud wala ray luganan da. No kaokolan daray luganan akin so pilien da ni et say mabmabli a singa Ford.

Ag da kaokolan so Ford a luganan lapud saray totoo so onpapasyar ed kapitolio ya onkekerew ya tolong. Say kaokolan da labat et ondago ed saray panlilimogan daray bokal ed kapitolio ya mangipasa, mandibati nipaakar ed saray risolusion na probinsia.

Akin ag nayari iran itday gasoline ration no so rason da et manggagastos ira ed iyakar dad kapitolio odino diad baley da? Balet satan so bili na panaglingkor ed baley.

Sakey yan mantsa ed administrasion nen Gob. Espino no akin ta inmaboloy ed saya.

Say ipanengneng to ya say panegnay betang ed gobierno walay katupag to ran pribilihio ya no murekdeken talagan wala balet aliwa met laya ya malinlinew ed petek na agew sayan pekewet ya kagagawa. 

Ag nayarin ikompara so probinsia ed arum ya melag ya probinsia. Sikaton ag ira onaasenso iratan ya probinsian angiter na kotsi ed bokal da lapud uunaen da ni so panggonggonaan da nen say panaglingkor ed saray kabaleyan da.

Sayang so P20 milion. Sayang so dayew na sayan administrasion. Ninonot da ni komon ya maong (Litrato: Love Krittaya).

Say sangkamurengan ya Pangasinense

Saray Pangasinense ya itandoro da ni so salitan Tagalog, Iloco tan Inglis nen say salitan Pangasinan.

Marcos Jr. ya matila

Ag ko inbotos si Bong Bong Marcos. Saramay Ilocano - aliwaak ya Ilocano anggano amtak so mansalitay Iloco - ya ag abangatan so nanbotos. Inap kon pati iray Pangasinensen say nonot da et Ilocano ra anggano wadia la ran abayag ed Pangasinan nanbotos met ed anak na diktador.

Salamat ta ag ko inbotos yay Jr.

Agay lay anggapoy baing ton ibaga ya no ag apaalis si Marcos nanmaliw komon kunoy Pilipinas ya Singapore! Ngalngalin tinmagey so presion na dalak ed sayan katilaan.

Agak manisian si Bong Bong asumpal ed ikonomiks ed Oxford. Anton lohika so walad nonot to ya nayarin manmaliw ya Singapore so Pilipinas no ag pinaikal na Pilipino say ama ton korakot?

Anggapoy kalakal ton kapara toy ina ton si Imelda ya no mansalita nipaakar ed ginawa ra anggapoy ginawa dan mauges ed oley dan duamplon taon.

Irayan Marcos maung iran manpikewet na antokaman ya bengatla. Ta no antokaman so ibagara kaokolan ya tampol ya ikorihi lapud saray Pilipinon maganon manisia.

Siopa ni ray "Marcos ni" ta tuktokan ko pa?

Pateyen so kanonotan ya so Pangasinan et parti na Ilocandia

Pian nabirbir so Pangasinan, kaokolan ya pateyen, paeren so kanonotan ya so Pangasinan et parti na Ilocandia.

Say region 1 ngaranan na Pangasinan-Ilocos. Lapud sayan ngaran ya Ilocos, nipalapag ya saray totoo dia ed Pangasinan et Ilocano. Tan lalo ton iitday sibeg so Ilokanisasion na luyag.

Ontan met ed saray taga-Cagayan tan Isabela pati saray kaagian ya walad palandey na Cordillera. Onbangon lay Ibanag, Itawes, Ibaloi, Kankanaey, Ifugao tan arum nira, italindeg day salita da, aliwan Iloko.

Say sangkamurengan ya Pangasinense

Duaran makatalos ya Pangasinan ta inyanak ira ed Pangasinan tan say atateng da et Pangasinan balet no mantotongtong ira diad Tagalog.

Say sangkamurengan ya Pangasinense

Say sangkamurengan ya Pangasinense et say Pangasinense ya katotongtongen ed Pangasinan et oneebat ed Tagalog.

Kasumpal nen Reyes, siopay ontombok?

Anggano corrupt, si Hin. Angelo Reyes et walay galang to.

Say arum ey ya singa si Hin. Carlos Garcia tan si Hin. Jacinto Ligot, wala kari galang da?

Iray arum ya opisial kasi ya akipinabang ed oley ya corrupt nen Gloria Macapagal Arroyo, ontombok  met la kasi ed si Angie?

No diad pananisia nen Reyes et say ipatey to ontonda la so panrikisa ed pamilia to, saya et gapo labat.

Balet si GMA ya nanlapuan na sangkamaugesan ya pamaakaran ed awaran na panaglingkor ed gobierno, ontombok kari ed si Reyes?

Inbangat kari sikato na maistra to nen grade 1 no antoy kabaliksan na galang?

Sakey linya na tren ya ondalan ed saray baley tan siudad na Pangasinan

                                                                                                     Maples ya tren ed Taiwan (Graham2000)

No pirawat na gobierno na Pangasinan so tugtuwan iyaliguas na probinsia, nakaokolan so marakep ya pamaakaran ed luluganan. Et sakey ya makaiter na mainawan transportasion so tren. Nen mabilay ni so Manila-Dagupan ya linya na PNR, ondadalan so tren ed Bayambang anggad Dagupan.

Sayan linya na tren no pinognonoten ya maung na gobierno et marakep ya idalan ed siudad na Urdaneta, Dagupan, San Carlos, Binmaley, Lingayen, Sual, siudad na Alaminos anggad Bolinao. Sayan linya et ondalan ed ipaparaan ya Sual International Seaport tan ed ipapalagey ya Alaminos international airport.

Say mikaduan linya et ondalan ed saray baley ed abalaten na probinsia.

Akin sakey ya linya na tren? Maples so tren ya luluganan na totoo tan produkto. Diad mainawan luganan, marakep so manpasiar. Sikaton pabunaen to so turismo. Pakasilen toy salatan na produkto. Selselan to so ikurang na industrialisasyon na probinsia. Pabulaslasen to so ikonomiya na luyag.

Say ombudsman ya bantiwel

Ag nailaloan so katunongan no walad betang na Ombudsman si Merceditas Gutierrez.

Sikato so mangiyayagel ni ed mauges ya hiniral ya si Carlos Garcia. Ya minosen to so agawa daray omiimbestiga ed sayan pikewet ya Garcia et makapakelaw. Akin onia so inaambagel ton kagagawa?

Akin kuanyo? Sayan plea bargain ya inkana daray rumirikisa et sakey ya kompromiso ta pian ag naibelyaw so arum ni ran pikewet ya kagagawa daray arum. Alimbawa dia si Angelo Reyes. Tan amay datin commander-in-chief to ya si Gloria Arroyo.

Sayan inakto nen Gutierrez et ag la sirin pankelawan ta malinew no siopa so aalageyan to.

No ag ikalen si Gutierrez ed panamegley na impeachment, saray totoo nen Arroyo ya nankuarta ed gobierno et elek elek labat.

Somlangen so simbaan, sansangen so CBCP

Say simbaan ya Katoliko so baleg ya samben ed panagkontrol na bilang na totoo ed Pilipinas tan ed mawayang ya kanonotan daray manpamilya. Say lupa na simbaan et wala ed grupo daray obispo ya tatawagen ya Tulagan daray Obispon Katoliko ed Pilipinas odino say Catholic Bishops Conference of the Philippines (CBCP).

Abayag la ran mibabali ed pamaakaran na istado ya kaokolan ya ag da pibabalian.

Kaokolan la ran ontonda ed sayan pimimitit da ed betang na istado.

Ag nira onaarawi ed kipapasen nen panaon daray Kastila ya sikara so numiro unon mangitatandoro na pamaepel na mawayang ya kanonotan daray indio.

Manbibilay irayan papari ed aboloy daray totoo; saray panaayaman da  lautlad saray obispo et baleg iran singa mansion ya di-kotsi ni ra. Aliwan sakey labat no ag ingen duaran luganan so nanengneng ed garahi da. Ag ira manbabayar na buis ed gobierno kaibad dia saray iskwilaan ya atayak ed kapoloay Pilipinas. Manbibilay ira ed yaman balet saray maiirap manbibilay ed linget, lua, tan kesaw.

Abayag lan nakaokolan ya ipasa so ley nipaakar ed panagkontrol na ikarakel na totoo diad Pilipinas.

Ag natalosan na simbaan saray maiirap; sikaton sasansangen da sayan iley. 

No ag onabuloy so CBCP ed sayan iley, kaokolan iran somlangen!

Ipawil so death penalty anggano anto itay ibaga nen Arsobispo Cruz!

Lapud anggapoy takot da ed ley ta makapoy so pamakaaran na katunongan ed bansa ya nanengneng ed inkakapoy na Korti Suprima, kaokolan ya ipawil so pamadusa ed panamegley na patey.

Anggano inikal da la yan pamadusa ed arum ya bansa, akin kaokolan tayon ontombok?

Ag tayo kaokolan ya ondengel ed si Arsobispo Oscar V. Cruz!

Korti Suprima baleg so betang to ed impandakel na kriminalidad ed bansa

Antoy koneksion na Korti Suprima ed kason carnapping-murder daray lumalako ya second-hand ya kotsi, ed saray pulis ya anggapoy kalakal da, ed saray pamapatey ed saray anggapoy kasalanan dan totoo?

Nen sinunggay na Korti Suprima so pasia na abeban korti ed kaso nen Hubert Webb tan arum ni ran akusado nen Disiembri 2010, abantayan ti la ed tv, adengel tayod radio, abasad talagew saray makapataktakot iran krimin ya singa ray akanggawa anggapo lay takot da ed ley.

Nakal so kompiansa na totoo ed Korti Suprima. Natan nakal so takot daray kriminal ed ley.