Villar: Pigara'y bawien mo no wala ka la'd poder? (Dios ag met komon nagawa)

Si Villar et sakey ya nigosianti.

No P1 bilyon so agastos to'd saya'y iliksion bilang poonan, pigara'n bilyon so nabawi to kasi no akayorong la sikato ed Malakanyang?

Say Dios ilaban to tayo komon.

Saray ag ibotos ya partylist

1. 1-UTAK ta alaen dan onalagey ed sikara si Angelo Reyes
2. Ang Galing Pinoy ya labay dan pilien si Mikee Arroyo
3. Batang Iwas Droga (BIDA) ta pro-GMA
4. Adhikain ng mga Dakilang Anak ng Maharlika (ADAM) ta pro-GMA
5. Agbiag Timpuyog Ilocano (AGBIAG) ta pro-GMA
6. Babae para sa Kaunlaran (BABAE KA) ta pro-GMA
7. League of Youth for Peace and Development (LYPAD) ta pro-GMA
8. Kalahi Advocates for Overseas Filipinos (KALAHI) ta pro-GMA

tan arum niran partylist ya onaalagey ed onbabatik ya kongrisista ya si GMA.

Ispiker na Abung daray Kongrisista? Kogkogipen mo labat tan GMA ta ag nayari'n iyabuloy na baley. Siamira'n taon ya inkapangolo, agka la onsawa?

ABS-CBN tan arum niran kompania'd TV, minanabang ed iliksion

Nen Marso 26 labat ginmapo so kampanya daray lokal ya kandidato. Akin balet onpapaway la so anunsio na sakey ya onbabatik ya miyor na Makati ed ABS-CBN ey?

Sinmobra la'y Villar ed airtime to ed TV. Balet akin ta nababantayan ni ray anunsio to ed TV ey?

Ag sarag kasi na sarayan kompania ya patondaen irayan anunsio no sinmobra la'd betang ya oras?

Say kua'y Kuarta: "Talk to me."

Manzano: Baleg ya lingo ed impanbatik nen Teodoro

Si Edu Manzano so baleg ya lingo ed politikal ya taktika nen Gibo. Akin?

Si Manzano ag to sarag so manalo. Anggapo'd suri to ya nayari sikaton man-bisi prisidinti. Sakey labat sikato'n popular ya artista'n manmaung-maungan.

Natalo sikato ed sayan onsabin iliksion.

Nayari ton igoyor si Gibo paleksab.

Si Manzano et sakey ya bagahi nen Gibo ya anggapo'y sirbi to. Maung la'n binmatik si Teodoro'n anggapo'y bisi to.

Angeles, Guevara, antakot ed saray ambagel ya istudianti

Onsosobra la'y lastog daray bomabasa ed UP tan PUP. Mapangta iran mangibantak na paintball ed opisina na CHED odino manpool na kagawaan diad PUP.

Iraya'n opisial balet so lalo'n makapabaing ta anggapo'y sibeg dan banoen tan ipanengneng da so awtoridad da ed arap daray arsonista tan akti-aktibista.

Diad sayan inaambagel ya kagagawa darayan istudianti, ataktakot ira.

Anto'y ipasabi to ya ey?

No ontombok ya taon, lalo'n naambagtit irayan istudianti ed kinapangta. Poolan da'y intiro'n iskuilaan.

Tan say kalidad na edukasion ed PUP, et aliwliwa la natan, lalo'n onaliwa.

Sankailin kompanian langis: Kabusol daray Pilipino

Saray sankailin kompanian langis ed Pilipinas: Shell, Petron, Caltex, sikara'y kabusol na bansa'n Pilipino. Kada tagey na prisio na langis, sikato'y iyayaman da, sikato'y iyiirap met na ordinarion Juan de la Cruz.

Sikaton sikara'y kabusol na Pilipino.

Kabusol met daray Pilipino saray onaalagey ya aso ya Pilipino daray kompanian langis. Sikara so mansasalita tan manamegley ed ibaga darayan Multinational Companies (MNCs). Minanabang ira ed atagey ya suildo.

Wala met saray kasosio'n Pilipino ya sikara so minanabang ed kada tagey ya prisio na langis. Stockholder amo amay wala'd oley na gobierno natan ed sakey ed saraya?

Ta piano ontonda so panaari darayan kompania, mananap tayo'y altirnatibo'd langis: inirhia'n manlalapu'd dagem, danum, singaw, daluyong tan agew.

Sikayo'n Pilipino'n sientista, igapo yo la'y mansukay ed saraya ta no andi, sarayan kompania opoten da'y pilak na baley.

Kaokolan so TFI: Siopa ray singeg ed poolan ed PUP?

Nabantayan ed TV so panselsel na apoy daray arum ya istudianti ed saray irongan diad PUP. Sasansangen da'y paraan ya itagey na wala'd oley na unibersidad say tuition fee.

Balet kaokolan ni ra kasi'n manpool ya gamit ed iskuilaan?

Pangolo'n Dante Guevara, akin pinolianan mo ra'n nagawa itan ed loob na kampus?

Saray mamaolo ed sayan golo, nepeg labat ira'n isuspindi. Nanmaliw iran maoges ya panaligan daray istudianti'n wala'd kalangweran lautla'd wala'd abeba tan atagey ya panbabasaan.

No aktibista ka'n onsosomlang ed autoridad ya wala ka'd nepeg mo'n alageyan, onaboloyak ed sika. Balet no arsonista ka, maong ni'n ikolong da ka'd pangawan.

Nasosobraan da lara'y manbabangat ed sarayan istudianti.

Diad sayan diniral tan pinoolan ya kagawaan na iskuilaan, manepeg labat ya itagey na PUP so tuition fee!

Paboritismo nen GMA, Dimoralisasion ed AFP

Diad inpanbetang nen GMA ed si Hin. Bangit ya Class 78, atilak saray mas sinyor ni ed si Bangit ed leksab ya miembro na Class 76 tan 77.

Wala'y labay ya lutoen na binari ed sayan getma ya immabuloy so hiniral ta labalabay to met ya irongan amay betang. No wala'y delicadeza tan galang nen Bangit ed saray matakken ni ed sikato'd taon, akin awaten to may betang?

Balet sayan lulutoen da wala'y naluluto met ya ag labay nen GMA ya nagawa ta ompano saya so singeg ya agto aboten so Hunio 30: dimoralisasion ed AFP.

Saya'n dimoralisasion komon so mangiter ya biskeg ed AFP lautla'd saray dimoralisado ya ag ira onaboloy ed maoges ya pilalek dara'y wala'd oley ed saya'y onsabi'n iliksion.

Ag napanpiaan si Noynoy nipaakar ed Hacienda Luisita

Dinmalan si Noynoy natan ya agew ed Pangasinan ta piano makala'y botos to'd saray masolok ya sakey milion ya Pangasinense. Bitbit to'y Kris ya makakailiw la ed Malakanyang.

Balet ag nayarin manalo'y Noynoy ed Pangasinan.

Sakey ya singeg: Hacienda Luisita.

Say kuanto no manalo'd iliksion bilang pangolo, say Hacienda Luisita et iter to la'd saray kasamak dima'd Tarlac ya mandadalos. Nitan balet may kapinsan to'n inbisuat to'd New York Times ya ag iter na pamilia Cojuangco so Hacienda ed saray dumaralos.

Siopa nata'y panisiaen?

No labay da'n tua ya iter itan, iter da la natan. Aliwan singa'd saya'y matila'n kiwas nen Noynoy.

Panisiaen da'y totoo lautla'd saray dumaralos diman ed Tarlac. No akayorong la ra ed poder, ilinguan da la ya'n promisa da.

Sikaton ag napanpiaan si Noynoy. No siak ag ko ipia so botos ko'd tila.

Nanlapu'd sangi na kabayo: Planas ed junta militar

Diad kuan da lanti'd Inglis, "straight from the horse's mouth", malinew so getma na sayan gobierno nipaakar ed panagbotos. Say kua'y Charito Planas, no ag natoloy so iliksion, nayari'n manoley so sakey ya junta militar.

Junta militar?

Aliwan kasi'n saya so labay ya nagawa daray wala'd poder?

Nonoten ti pa.

Aya'y krisis ed iliktrik sikato ya so paraan da ta piano ibelyaw da ya ag sarag so panagbotos ed Mindanao. Natan ta failure of election, onggalaw la so AFP ed panamegley nen Hin. Bangit ta piano iyorong so sakey ya junta militar. Kasumpal ya pigaran simba odino bulan, diralen da yan junta ta iyorong da la may amta yo la no siopa.

Junta militar sirin et ag arawi'n nagawa.

Balet no natoloy ya, anggano Dios ag da ti la ilaban!

Pinmawil lamet so gun for hire, akin ag da napatonda ya na PNP?

Sakey ya abogado na baley so pinaltogan da ed siudad na San Carlos.

Akin magano la'y manpapatey ed luyag? Akin kasi?

Ta say gun for hire et sakey la'n negosio dia ed Pangasinan.

No sayan krimin et koniktado ed panagbotos, natokoy langula saray partisan armed groups, saray pribado'n ngayew dara'y politiko.

PAG + Gun for hire = negosio tan golo.

Iner so panlalapuan darayan paltog? PNP, AFP, inposlit (smuggled) ya paltog.

No onia so kipapasen na probinsia, mananap ka la'y arum ya panayaman.

Say baleg ya panononong ed krisis ed iliktrik

Saya so otit ya baraha ed lima dara'y wala'd oley: say krisis ed kurienti.

Saray mamaolo ed saya:

1. Opisina na pangolo
2. Dipartaminto na Inirhia
3. NAPOCOR
4. National Grid Corporation of the Philippines

Sayan "grand conspiracy" ipanengneng to labat so kinakapoy dara'y sientista tan inhinyiro'n Pilipino.

Ag komon onabot ed sayan krisis no tugtuwa yan krisis no maung saray totoo tayo ed sarayan abitla'n ahinsia.

Ta say pankaokolan ed inirhia na sakey ya bansa et naimano la'd kuenta diad andi labat samplura'n taon; sarag ti manparles angga'd limamplo'n taon. Anggano sakey siglo nayari ingen.

Makapoy met saray ikonomista tayo numero uno la'd wala'd tagey.

Pano'm ya polian so inirhia ed paraan na ibolaslas na bansa ta aya so kaokolan na saray industria ta piano nagamora'n so progriso?

Amtak ya saya'n krisis et artipisyal.

Sikaton sikayo'n makaamta ibaga yo pa la. Ta say pasnok na totoo sabien da kayo no linoloko'y nagawa ed sayan panagbotos.

Oy, 1-UTAK mureng kayo no paolian yo'y Reyes ya mila ed sikayo!

Labay na 1-UTAK ya si Angelo Reyes so onalagey ed sikara ed Kongriso. Anto? Piolit yo pa. On, labay na 1-UTAK ya say promotor na panagtagey na gasolina so mangiwanwan ed sikara. Labay da'n say kasabwat dara'y kompania na langis so mangiyolo ed sikara.

Mureng kayo'n tua no ontan so labay yo! Odino diad dalem to ya kasabwat da ki met la ed paraan da'n gaween si GMA ya pangolon ministro?

Sirin, ag ti la ibotos so 1-UTAK lautla'n wadtan si Angelo Reyes!

Anggano labay tayo o andi, GMA kayarian to so mangibetang ed SC

Sarayan abogado, maung iran manggawa'y labir.

No siopa ra'y kaokolan ya manpaliwawa'd ley, sika ni ra so manpabilonget ed kanonotan dara'y totoo.

Makapakelaw so dikano na UP College of Law tan say Philippine Bar Association ed ibabagara'n maoges ed pasia na Sangkatageyan ya Okom.

Anggano labay tayo odino andi, sarag nen GMA ta wala'd poder to so manpili iyorong to bilang pangolon okom ed taluran nominado na Judicial and Bar Council. 

Hiniral Bangit: Manag-iter ya iligal ya ganggan si GMA?

"Agak ni akaawat ya iligal ya ganggan ed si Pangolo'n Arroyo," saya so inbaga nen Hiniral Bangit, say balo'n yorong ya AFP chief of staff ya initdan da'y betang ta sikato kono'y mangiyolo langula ed paraan ya onbayag ed oley si GMA.

Anto'y labay mo'n ibaga, Hin. Bangit?

Ya si GMA et managganggan ed iligal ya kagagawa? Ya manpasalamat ka ta agto ka ni initdan ya maoges ya ganggan?

Manalagar ka ed saya'n onsabi'n iliksion.

Bureau of Fire Protection, anto'y singeg dara'y pool?

Kada pool, nitan so BFP ya manerep na apoy san kasumpal mansukay no anto'y singeg. Balet kada sukay da, ag da nibaga'n diritsa no antoy nansingegan to.

Ibaga da ya nanlapu'd alinguanan ya aselselan ya kandila.

Odino ag  narep ya electric fan singa'd pool ed Mangaldan.

Tokoyen da met may daan ya electrical wiring.

Anto kasi kuya'n bombero? Akin ag yo aaralen iraya? Odino ngiras yo labat ya mankimey.

Sangkatageyan ya Okom, aso nen Arroyo?

Natan ya agew so impansingil nen GMA ed saray inyorong to'n okom ed Supreme Court.

Saray nanbayar ya otang ed linawa et sikara di:

1. Lucas Bersamin
2. Jose Perez
3. Roberto Abad
4. Martin Villarama
5. Teresita Leonardo-de Castro
6. Arturo Brion
7. Diosdado Peralta
8. Jose Mendoza
9. Mariano del Castillo.

Balet diad sangkatageyan ya ley, say kuanto'd  artikulo VII nipaakar ed ihikutibo, seksion 15:  "Duaran bulan kabebekta sakbay na ontombok ya panagbotos ed pangolo tan angga'd isompal na tirmino to, say pangolo odino onaalagey ya pangolo ag nayarin mangibetang, likod ed saray betang ya timporario ed posision ya ihikutibo no saray bakanti et diralen to so linkor ed publiko odino iyan to'd piligro so publiko'n kaalwaran."

Ag to sakop ya so pangibetang ed sangkatageyan ya okom.

Boxing bilang pakasilan na lapag ya bansa

Ontotolong ed ikonomia si Pacman. Diad $12 milyon ya dolyar ya inpaway na laban to'd si Clottey, baleg so nailoob to'n kuarta ed foreign exchange reserves na bansa.

Natan, gaween ti la'n national sport odino pakasilan na lapag ya bansa so boxing.

Imbis ya onbatik, si Pacman la mangiyulo ed panggamor ed sayan getma.

Manbangat tayo'y dakerakel ni ya Pacman ya manmaliw iran champion. Anggapo'y duaruwa, makatolong ira ed ikonomia.

Pacman, mandengel ka pa'd si Mommy D

No si Mommy D so natolok, ag to labay ya onbatik si Pacman ed sayan onsabi'n iliksion.

Mandengel ka pa'd Mommy D Manny.

Ag ka la mila'd mundo dara'y matila tan matakew.

Odino pitamitam mo met so mantila tan mantakew?

Tombok mo pa'y pilalek nen Mommy D Manny.

Nipaakar ed rilasion daray Pangasinan tan Ibaloi

Pinmaway may salaysay ko'n "Exploring the Pangasinan-Cordillera Connection: The Pangasinenses and the Ibalois" ed The Cordillera Review 1 (2) September 2009. (Say talintao nanlapu'd website na UP Baguio Cordillera Studies Center)

No siopa'y ibotos bilang gobernador na Pangasinan

Say mangitandoro ed iyabig na baley.

Say mangitandoro ed salitan Pangasinan.

Say manbilay na kulturan Pangasinan.

Say mansoporta ed litiraturan Pangasinan lautla'd saray sumusulat.

Wala kasi raya ed saray onbabatik?

Naliliknak singa anggapo.

Si Erap papawilen ti ni?

ANDILA.

Antoy nibagak ed si Villar?

C5.

Abril 5, pitsa'n inkaletneg na Pangasinan?

Dakel so tepet ed Abril 5, 1580 bilang pitsa'n impanggapo na luyag ya Pangasinan.

Anggapo'y tugtuwan historiador ed samay ulupan ya binoo da ed sayan panagsukay.

Pinaplesan da'y pandiklara ed sayan pitsa ta piano naipagamor so P 3000 anniversary bonus, andi kari?

Kris, no analo'y Noynoy

Ag ni analo'y kuya to ed inkapangolo, si Kris Aquino onkikiwas la'n singa riyna, binari.

Saya so ag ko labay ya naimatonan no analo'y Noynoy ta lalo'n onlastog si Kris.

Onpawil langula'y "Kamag-anak Inc." Wala'd Malacañang so sakey Riyna Rihinte ya siopa ni aliwan si Kris.

Sayan ripublika, manmaliw laingen ya monarkia.

Si Noynoy, linmugan labat ed ngaran ya atateng to

Anggapo'n balot so nanengneng ya kalidad na pangolo ed si Noynoy. Linmugan labat ed maltaw ya ngaran na atateng to: si Ninoy tan si Cory. Singa manaapura ta anggapo met ni nipanengneng to'd inkasinador to. Sakey salita: ambisioso.

Natan anto'y nibaga ed si Kris?

JC de los Reyes, say "conscience vote"?

Kua'y simbaan, si JC de los Reyes kono so "botos na linawa" ed sayan onsabi'n iliksion. Akin kasi? Si de los Reyes et anti-Reproductive Health Bill ya aalageyan na Simbaan ya Katolika.

Diad sayan posision, sikaran dua et laban ed progriso na bansa, kontra'd iyabig na totoo.

Sikaton no ag ibotos tan ag manalo si de los Reyes, tampal ed lupa na simbaan.

ASNA awards, asna nanlapu'd asin?

Natan ya Abril 2010, pagalangan saray maumaung ya Pangasinense ed antokaman ya katigoria ed tatawagen ya "ASNA awards."

Diad inpaway da'n ganggan, say "asna" kono et nanlapu'd daan ya porma na "asin" tan insita da ni may diksionario nen Lorenzo Fernandez y Cosgaya. No pawilen si Fernandez balet anggapo'y ibabaga to'n onia.

Revilla, Lapid, ag ti la panaloen!

Makapal so lupa darayan artista: Lito Lapid tan Ramon "Bong" Revilla Jr. Onbabatik langula ira ed Sinado bilang sinador.

Anto'y gagaween da ditan no ag manbotbot ya irungan say kua'y amak.

Tua itan.

Sikaton ag ti la ibotos.

Wala'd nonot da labat so P200 milyon ya CDF.

Gibo: No akin natalo

Marakep so plataporma nen Gilbert Teodoro balet:

1. say koneksion to'd si GMA so baleg ya bagahi.

2. saray ads to aga makakonikta ed saray totoo. Panon to ey ta say karaklan dara'y Pilipino ag ni tan ag makalugan ya iroplano.

3. makapoy so organisasion ya mankikimey ed panagbatik to.

4. kulang ed pilak.

Ompano onbawi sikato no agew ya eleksion.

Galila'd nukliyar ed Pangasinan balet...

Atrasado la'y Pilipinas ed tiknolohia'n nukliyar no ikumpara sikato ed arum ya bansa diad Abalaten-Bukig na Asya.

Diad Pangasinan, galila'd nukliyar balet kaokolan ya napriparaan saray atagey ya awiran ya mangiletneg na sakey ya Pangasinan Nuclear Research Institute [Awiran ed Panagsukay ed Nukliyar ed Pangasinan] ed singa Pangasinan State University ya manbangat ed saray sientista tayo'n manlapu'd Pangasinan lamlamang ed tiknolohia'n nukliyar. Sayan awiran et wala'y wayang to'n ag pisakop ed Philippine Nuclear Research Institute.

Itagey to yan awiran so kalidad na panagbangat tan panagsukay ed siensia lautla'd nukliyar ta piano makapansompal tayo'y sientista'n nukliyar ya taga-Pangasinan.

Polian ti la'y ibabaga na simbaan ya Katolika ta ag da amta'y pankaabigan na baley.

Pacquiao vs Clottey, aluto la?

Aluto la kono'y laban nen Pacquiao ed si Clottey. Saya so talabotob dara'y tomatraysikel tan arum ni ran managpasada'y jip, van tan bus. Balet no bantaya'y laban da mairap ya panisiaan ya ta diad boxing onaarap ka'd ibilay odino ipatey!

El Niño tan midia na baley ed TV: Maung iran manggawa'y paga

Diad kada lukas na TV no alas sais treinta, nitan lara'y balita nipaakar ed El Niño ya mantatalintao'd sakey ya baleg ya krisis. Natan no sika et manisia'n tampol, singa ka met la apatit ed pankokondision da'd linawa na totoo.

Saya'y El Niño komon et maganon naanapa'y polaing. Et makatolong komon iraya'y dam. Balet sarayan dam natan so baleg met ya sulit.

Lapud kapoy dara'y sientista tayo tan diad maoges ya getma daray politiko, sikaton ayan El Niño, et ugaw la lanti, et ag ti ni nabano.

El Niño tan saray dam: Akin ag da ibolos so danum ta piano nadanuman saray kalayan?

Aya'y El Niño abayag lan kipapasen na klima. Natan singa diad balita et balbaleg yan pakelaw ya manggagawa'y paga'd saray totoo.

Pati ray dam ya pangalaa'y danum ed irigasion et sinibelan da la'y pangipaway daray danum. Imbis sirin ya makatolong ira'd pamaranum na saray namamagan kaumaan ta danum lantin atipon ed mauran ya tiempo, natan anggapoy kakanaan da lamlamang.

Ibolos yan danum ta piano nabawasan so idiral na otiagew ed saray tanaman: pagey, mais, pising tan antokaman.

No kasabi lay nepnep tan bagio, sarayan dam so mansirbin palanggana'n mansingkat ed saray danum piano ag nadelap so luyag.

Diad pangisiblet day danum natan ta kaokolan so danum ed kapageyan, no mamauran la nitan langula'y delap.

Diklarasion na state of calamity, pangalaa'y kuarta'n ibolsa

Saya'y panay ya pangibelyaw ya wala'd desiang so sakey ya lugar et sakey ya pamaakaran ta piano magano'n nipaway so kuarta'n ibolsa odino usaren para'd saya'y eleksion.

Say ikakana da natan pian nagawa da yan getma ayay tatawagen ya El Ni ño ya salitaen ko'd ontombok.

Say simbaan ya Katoliko so samben ed RH bill, samben ed progriso na baley

Ipokrito ra'y simbaan ya Katoliko ed pankontra da'd Reproductive Health Bill. Labay da'y napansiansia so kairapan ed Pilipinas ed panaglobo na populasion na bansa.

No sikara so sinomlang nen Rizal, sikara natan so kaokolan ya somlangen.

Akin ta kaokolan ya dengelen irayan aka-bistida? Sikara kasi so manpabaleg na anak dara'y anak lan anak? Sikara kasi so mangiter ya trabaho ed sarayan ogugaw ya onbaleg ya mananap na kimey?

Andi.

Mindanao so pansaulan ed sayan eleksion

Ag ontonda'y brownout ed Mindanao. Anggapo'y tonda toya kono angga'd isabi botos. Aya so ibabaga nen Angelo Reyes. Nansalita la'y pangolo'n managtaktika nen GMA.

Agi, Mindanao langula so sintro na pansaulan da.

Saray makaamta ed sayan krisis ed korienti, mansalita la!

Brownout ya anak na lasin si Angelo Reyes

Brownout ya anak na lasin si Angelo Reyes!

Nen katantaon, inbaga nen Reyes ya natan ya taon et onsabi ra'y brownout. Amtak ya ikokondision da la so totoo diad sayan paraan da ta eleksion la.

Natan, managparles ya tua si Reyes ta tinmua may inbaga to. Brownout ya sakey oras, duara, talora...

No akin ta inyan da si Reyes ed Dipartaminto na Inirhia, aya lamet so makapakelaw ed saray kelaw ya kagagawa nen Arroyo.

Makapoy kasi ra'y inhiniero tan sientista  tayo ya ag da amta'y isabi no onkolang so kurienti tayo ed ontombok ya limamplon taon? Ta irayan planta et daan la ra ya kaokolan so mangipaalagey ya balora'n planta?

Odino inyan da'y Reyes ta piano naipanengneng to'y inkakapoy to? Inyan da'y Reyes kasi ta sikato so mamaolo na sakey ya paraan ta piano onsalindak so getma'n maoges ed onsabi'n eleksion no Mayo 2010?

Satan ya duara.

Makakelaw ya'y salat-salat ed gabiniti nen Arroyo

Makakelaw ya'y salat-salat ed gabiniti nen Arroyo. Pigara'n bulan labat la et nasumpal lay tirmino to. Akin ag to la ra pinansiansia ed puesto ra? Diad sayan kamelag na panaun, anto ni kasi nakimey darayan opisiales? Balon opisina, balon pamaakaran! Lapus ed Trade and Industry? Valisno natan ed Dipartamento na Edukasion? Agi, saray pamaakaran ya intilak nen Lapus kaokolan ya kabaten lamet nen Valisno. (Quo vadis (iner so laen to) yay MLE?) Si Favila ed Monetary Board tan arum ni ra. 

Sakey yan baleg a lingo ya wala labat so maoges ya getma sikaton intolok na pangolo.

Sulat na umaanlong ed saray kaanakan to

Ugaw kini natan
palbog ni’d dokolan
nonot wala’d amayo
tan kindin masamit

No makalakal kila
pidengel yo pa ya
ilaloan kon anta yo’y
salita nen Lakin Anoy

Ta no andi kaokolan
iyalis ko’d Tagalog
dila nen Balagtas
tanila’n oley natan

Onbabaleg kayo’d
salitan binayes
ed uliran tan tongtong
sankaili’y bayani

Arin eleng ag apildak
baogdan amputin
singa asukar
buek a mais-maisan

Aliwan singa’d si Siogen
maltaw a manag-anop
aluto’d agew
inames ed asin na dayat

Tan si Apo Anno
naingaran ed alog
mabiskeg a laki
galawan toy takel

Sikara’y atateng
na polin nanlapuan
dala’n onaagos ed ulat
nanayam ni’d poso’ra

Aral yo’y Pangasinan
ngeswa na kamarerwa
taningting to’t narengel ko ni
ed palandey tan kaumaan

Esaes, elek, orangal nen ugma
intikyab, inyatol na dagem
pian sikayon anak na Caboloan
makatalineng ed si Apolaki

Kabaten, kotkoten so lamot
potel kayon onalagey
aleg yon aligen saray arom
nilinguanan da’y dilin baley.

[Saya'n bersion so pinmaway ed Anacbanua (Sine Caboloan, 2009) nen Christopher Gozum.]