Resibo

Erwin S. Fernandez

Sakey ya agew ed bilay nen Mariano, nanpakabit sikato ya extension line parad teleponoda. Walay telepono ed salas da balet diad tagey na abong o ed second floor anggapo. Sikaton no man-internet, awiten to ni ya amin may cpu tan monitor ed beba. Simmawa lad sayan kagagawan beba-tagey sikaton nan-apply.

Kaokolan la natan so internet singa cellphone. Sakey click labat et walay contact mo lad saray kliyente. No gabay mo mangipawit na sulat, idalan mo lad internet ta aga ni nabalang. Wala may agawa ed sikato nen impawit to may sulat tod koreo. Pigaran bulan nen simmabi man ya sulat ed amigo to. Duaran bulan amo.

Limma ed baley; diad opisina, nankorit ya application form.

“No next week et nayarin olla may too mi,” kuanto may maganan bii ed Iloco nen tenepet nen Anoy no kapigan so isabida ramay mankabit. Atepet to la no piga so bayar et so bayar manaya naibilang la ed untombok ya bill. Semmempet ya imbalita tod ina to. Maleket ton imbaga ya no onsabin Biyernes naikabit da la may extension line.

Simmabi so Biyernes, aga akaolla may taga-GIRITEL. Kabebegta nen Sabado, timmawag may too ya olla kono no Simba. “Olla kono may laki nabuas,” kuanen ina to. Mangkelaw si Anoy ta panon Simba ya olla et painawa met ed satan ya agew. Nanalagar sikato balet anggapoy limmad sikara. Nanlinis nid tagey pian aga met kababaing.

Apalabas so sakey, duaran simba anggapoy simmabi ni tawag ya mangibaga komon no akin.

“I-follow-up ko pa ed GIRITEL,” kuanen Anoy ed si ina to. “Tawag ka a tan tepet mo met no pigay bayar no manpakabit ka met ya internet.”

“Hello, i-follow-up ko lang po yung application namin for extension,” kuanen Anoy ed telepono nen adengel to ya nansalita may bii. Agto abosesan ya sikato met manaya may biin akatongtong to. “Nag-apply po kami two weeks ago ni,” kuanen Anoy nen tenepet na bii no kapigan sikaton nan-apply. Apansin nen Anoy ya walay tono ya Pangasinan may bii sikaton nansalita la ed Pangasinan. “Akin ta aga limma may too yo?” say tepet to. “Sir” nantagalog nen sansiya, “kasi po marami po kasi ang ninakaw na cable at kailangan ang tao roon. Pasensiya na po.” “Kailan kaya maikakabit yon?” “Di ko po alam pero sinabihan ko na po yung tao namin.” “Sige at hihintayin ko. Salamat, “ embebato so receiver na telepono.

“Antoy kuanda?” say tepet nen Azon, say ngaran na inaro ton ina. “Antayo met la, nanpalusot ira ya iramay tooda et dakel so gagawaenda.”

“Talagan ontan iratan,” akangngel ya imbaga nen ama to ya si Pilo. Kasemsempet ton nandalos ed dalin dad sagur na alog na Mitura. Akasumpal ya duaran taon ed political science balet timmunda nen agda la sarag na ateng to ya panaralen sikato. Sikaton nankoli ya nantrabaho ed dalinda. Say kesaw tan kasil to et limmad panan-aral na ilalakto. Si Anoy asumpal ed abogasya. Say kumadua ya si Binay, walad London ta nurse diman. Say bolirik, si Mario, et mannaaral ni ed Baguio major ed civil engineering. “Aga duma so public tan private ya burukrasya” kuanto nen nanpensew si Anoy. “Say kuandaray iskolar baleg so itulong na pribatisasyon na GOCCs ta naekal so inefficiency tan ontagey so revenue. Ontagey met so kumpiansa na publiko ed public services. Balet nanengneng naani.”

Agda gabay lan mantrabaho si Pilo balet anawet so ulo to. Binulan met ya mangieter si Anoy tan mangipapawit met si Binay ya dies mil kada kinsinas. Itulok nen amara balet ya kaokolan toy ondalos ta gabay ton nanatnat saray lamanto manlapud takeb inggad sali. Antoy kakanaen to no akairong labat ya lanang?

“Yurong kayo dia ay, ama,” say salita nen Anoy santo inyasingger may plastic ya irongan. Ingaton nen Pilo may awit ton jug ya panginay danum ed lamisaan. “Salamat,” san nanbalita no antoy agawa ed bangkagda ya arawi ed irigasyon. “Sayang iramay intanem ko. Amaga-maga may dalin sikaton inaatey iramay pagey. Kapigan kasi so ipospos na dry spell? Baleg lan kapital so pimmawey ed bulsa na karaklan ya dumaralos.”

“Balet no onuran, delap met so problema,” kuanen Anoy. “Ta lanti,” say ebat nen Pilo. “Aga natalusan so klima natan ya panaon. Kuanda La Niña soy wala natan bangta aga onooran.”

“Pawil tayo pad ibabaga yo niman,” kuanen Anoy ya walad arapan na dalikan. Inerep to may gasul ta aluto la may baaw. Nanaklo la ya sira tan baaw si Azon. “Mangan tila. Manoras kila. Alamla ramay kubiertos, Pilo. Anoy, punasan mo pay lamisaan.” Say sira da et impangat ya galunggong.

Akadongo lan amin. “May ibabagak niman,” inggapo nen Pilo, “saray pribadon kompanya paris tod saray gobyernon kompanya et panlalapuan ya korapsiyon. Say amta na totoo say gobierno labat so lawas tan mabetbet ya nababalitan lanang so red tape. Tua met ingin a. Lurey mo tay natural la so mantakew tan soy kickback et parte la na sistema.” “On lanti,” say ebat nen Anoy. “Diad DPWH, DepED tan arom ni, sikara so number 1 ed graft and corruption.” “No mansabwatan say ahensia na gobierno tan pribadon kompanya,” say imbaga nen Azon, “atan la so ibabaga ran mother of all scams. Neng mo pa tay Expo Filipino, Terminal III tan Diosdado Macapagal highway, inggad natan anggapo ni soy limmad Bilibid.”

“Azon, nanonotan mo ni may agawa ed si Binay?” say olipet nen Pilo. “On. Amay kimmerew may taga-DFA ya P50,000 pian naitdan ya tampol ya passport si Binay. Sakey simba labat la et aalagaren da la sikato ed St. Mary’s Hospital. Anggano agto gabay et nanbayar la.”

Aga akasalita si Anoy ta anonotan to may agawa met ed sikato. Mana-apply sikato ya driver’s license ed LTO nen walay simmenger ya laki. “No kayat mo nga maala nga dagus, siak kon ti makaammo dita, basta agbayad ka laeng iti tres mil.” Agto gabay la so naabala, sikaton: “Mano nga aldaw ngay?” “Two to three days lang.”

Diad NBI met nen kaokolan to so clearance parad biyahe tod Amerikan ondagop ed sakey ya International Human Rights Conference. Diad mismon loob na opisina ed Taft Avenue et wala ray fixer. Pian onbatik may papeles, mangiter ya under the table ya P500.

Sakey ni nen mana-apply ya scholarship ed UK, nan-ofrece may doctor ya pirmaan to la may health certificate anggano aga dimmalan ed check-up. Say catch balet et manbayar ya liman libo.

Nen apalabas ya simba labat, diad legal practice to ni et amay judge ya nannegnay kaso to et abayaran. Maksil so ebidensiya da ya onpabor ed kliyente to may desision. Say kaso et rape ya soy nan-gawa et anak na pulitiko. Imbis na reclusion perpetua et naacquit ni may laki. Natan et akar-akar ed baley ya singa ari.

“Sikaton so korapsiyon nagagawa, ta wala ray totoon onaaboloy. ‘Walang manloloko kung walang nagpapaloko’ kuanda ed Tagalog,” say pangisuma nen Anoy ya amawmawan ed kanononot to.

Diad onsono ya agew, anggapo ni may too. Timmawag si Anoy et apologetic may bii ya agto amta no kapigan makasabi may too ra. Panangan la ngula et satan so topic of conversation da. “Anto ira tan ya totoo? Onsabi lay patey anggapo nira,” makakalek ya kuan nen Pilo.

Talura, apatiran agew, itan lanang so pantutongtongan ed lamisaan. No maminsan say pan-istoriaan saray agawgawa ed bilay na kanayonda. Singa si Laki Asiong ya akiasawa la lamet nen inatey si Bai Goria. Sakey simba labat et wadman lad abong may bii. Pitlo lan asawa si Sion. O si Bai Atang ya ibabaga ran manananem. Tinaneman to kanoy Laki Ponso tan si Bai Goria. Kasal nen Lili no ontumbok ya Lunes. Inlako da la manaya may dalin diad abay na abongda ya pangipalageyanda kanoy ospital. Ed sayan balita, mapaga si Azon ta say datin maulimek ya lugar da et panlapuan lay ingal da ray lugan ya manparadad kulanda. Say paga nen Pilo balet amay pangibantakan day basura. Asingger ed alog may sangpot na dalin. Kuanen Anoy kaokolan ya manpagawa iray incinerator ya panpoolan ed saray hazardous ya gamgamit da ta no andi et manpetisyon ira.

Mierkules, simmabi may duaran toon mankabit na linya. Timmunda may lugan da ed arap na gate. Kaiba da ray duaran bataan dan balolaki. Timmawag ni ra manaya ed abong ya amindua nen kabuasan. Say akatongtong da et si Azon. Binangon nen Azon si Anoy ta olla ira ed baley. Si Pilo et walad dalin da.

Nilukasan nen Anoy may gate. “Pasok po kayo.” Limmoob may duara san timmombok iramay duara met balet atilak ed paway.

“Sa taas po, kuya.” Amay lakin andeket tan melag so simmigep diad tagey. Awit to may kawat na linya. “Ditan nay so pansuldongan,” kuanen Anoy ya ituturo to may kahon na pankabitay linya.

“Ang akala ko kasama na yung box na pagkakabitan ng modem?” say tepet nen Anoy. Mankelaw ta so pakatalos to amay application fee kaiba lan amin. “Hindi pa. Pare, kunin mo nga yung box.” Simmegep met may mataban laki, awit to may box. “Say onsubra balet ed dos metros, walay bayar to ya sinkuenta kada metro,” impatalos to may laki. “On, antak itan,” kuanen Anoy.

Sinukat to may laki may dukey na kawat manlapud veranda inggad computer ya walad loob na silir nen Anoy. “Sampluran metro.” “Agay lan kadukey tan ey?” opapet nen Anoy. “Aleg yo nen puputuren.”

Angalay metros ed beba santo sinukat. “Puter yo labat so limaran metro.”

Asumpal lan naikabit nen nantepet may lakin dismayado ta aga sampluran metro so aputer to, “Bayaren yo la natan o charge la ed bill?” “Pigay bayaren ko a?” “No limaran metros et ekalin so duara, walay talura sikaton P150 tan P200 ni ya application fee. Amin amin et P350.” “Mabli.” “Mitongtong kilad kaibak a sirin.”

Akin ta mitongtong ni sikato ed kaiba to kuan tod nonot to. Walay aliwan gatma da irayan duara. Say gawa da et idukey da may kawat pian baleg so ibayar. No mitongtongka singa gawa da la man ya kwarta. Siguradon aga ira mangiter ya resibo.

“Walay resibo yo?”

Nen tenepet to ya, bimmalangay aping to may lakin singa aka-shabu ta ambalangay mata to san kuanto, “Diad opisina kila sirin mambayar.”

Akaimis ya imbaga nen Anoy, “Sige, diad opisina la.”

Sinubok to may internet connection na desktop to. Asaliw to ya diad unan sweldo to. Anggano daan la et dakel lay naitulong to. Nilukasan to may yahoo account to san to denewet may compose. Aya so inkorit to:

Mita,

Nayari kasin mannengnengen ta nabuas ed Jollibee? Pantongtongan ta so planok ya iyakar ed Court of Appeals say kasom.

Kuyang Anoy

Magayagan binasa to lamet san denewet na cursor may send.

Kabuasan, bimmangon ya masakbay si Anoy. Say tongtongan da et alas otso. Nanames tan nanpatanir ed ina to tan imbagaton man-almusal lad man. Limmugan lad jeep ta agto gabay so natrapik tan makatipid nid gas.

Walay limaran minuton nanalagar sikato ed loob na Jollibee nen anengneng toy Mita ya akakawes ya berden blouse tan akamaong. Tinawag to san imbaga to, “Kumusta ka? Antoy gabay mon orderin? Treat ko lad sika.” Nanimis ya kuanto: “Siki met. Nen aminsan, sikila. Siak met natan.” “Andi. Polyan mo la man.” “Mapilit kayo met. Atay kien labat la sirin, tapa.” Immalagey tan akipila san pimmawil ya awit to may tray.

“O, ilaban ta may kasom?” kuanen Anoy kasumpal ton inakmon may sakey pisag na longganisa. Abayag ya nansalita si Mita. Singa mandurua no ilaban to ni. Si Mita et anak na sakey ya anak na dumadait. Kasumpal tod kolehiyo, limmoob ya sekretaria ed munisipio. Say amo to et mayor na baley balet no maminsan kaokolan toy olla ed abong na mayor. Diman ya agawa so doksa na kapalaran to.

“Andila amo,” maulimek ton kuan nen Mita. “Tan saray ateng ko et tataktakoten da ra.” “Aleg kan mapaga, Mita, ta iloob ta kad police protection program. Wala met soy iposte dad kulan yo.” Nanpiyeng si Mita san kuanto: “No iratay pulis et kasabwat da met, panon totan ey?” “Wala ray pulis met ya maabig tan walay kabat kon aga singad pakanengnengmo.”

Limmagey ya maliwawa so lupa nen Anoy.

Biyernes nen pimmekal sikato ya manpa-Manila. Akasabid Orosa St., diad kulay Court of Appeals ala una ya ngarem santo insubmit iramay dokumento. Manalagar nen pigaran bulan ta iiskedyul day hearing.

Simmabi may notice of appearance duaran bulan ya masolok. Nen naawat nen Anoy et tinawagan toy Mita ta no onsabin Lunes la iman. Diad duaran bulan ya aya, inaral ton maong so komplikasion na kaso. Say DNA test ya nanlapu nid Amerika soy ebidensian bebembenanto. Diad pigaran hearing ya presente sikara et asabiy taluran taon ya pannaalagar.

Sayan agew la et ebeba day desisyon na korte. Nen akairong la may judge, akalagey la may eskribiente san kuan to: “Based on the evidences presented, the court finds the accused guilty of the crime of rape and …” Agtola pinasumpal nen Anoy ta nilakap toy Mita ya manlulua ed sayan panalo.

Balon Silew 8 (1-2) (Enero-Hunio 2008): 26-28.