Somlang

Mam E

(pakanonotan kinen Prop. Nieves Benito Epistola)

Inatey kayon agtakayo amaestraan,
Diad UP inaron escuelaan;
Mam E so inngaran day escuelayo,
Polyan yo ak ’katoy itawag kod sikayo

Mam E nen akasawa kilay Epistola,
Panón nen marikit kayo, Mam B, awa?
Akin ta aga Mam N
masanting met ya ngaran?

Sakey ya ngarem agko nalinguanan so pan-imes yod siak,
Ed Recto Hall nen asumpal so tepetko, pansalitak;
Pati say matayo angankoy makabirbir ya kabaleyan
Matan unan timanguad banwa ed Caboloan

Anggano inaral yoy arom ya dila,
Inaro yo met so salita nen Urduja;
Say binetla nen melag ya ugaw kini,
Atan met so, on atan!, salitan bekásen yod si Apolaki.


Say Ágila

Diad toktok na kiew ed palandey
singan arin akalagey
onbántag ed leksab ya makaoley

makdem so mata to’d atatagey ya pasén
ikampayto saray pakpak ya matakken
ontikiab mansingkat na kanen.

Quo Vadis, Baley ko?

Natan inerso laen mo, baley ko?
Kasumpal na duaran bagio;
Nantilak ya dilap tan gawat,
ed dakel ya lúyag

Saray anak mo’d biektaew
naisalét ed duaran bánsan mibabakál;
Ed Bikol say Mayon ngalngalin onterak,
No natuloy et dakel so manirap

Ontagey langula say bili na tariwa,
Gasolina tan plete ontombok metla;
Balet anápan na dumaralos, maestra
Onsingger la’d pambilay na alila

Politikon tilaan sikara labat so naksel,
Say táwag na baley agda naderengel;
Saray totoon makaantad pamaábig mo, Baley ko,
Bulág, emél, télek ed panmaongan mo!

Baley kon Filipinas, kapigan so kawayangan mo?
Pián ondayew ed Pilipino say mundo,
Pián patit na revolución o junta militar nayarawi ka
O ed masamit ya invitación na diktadura!

Iná

(dedikadod si Florida S. Fernandez
ya inianak nen unan agew na Agosto)

Pimmaway ed bao
anagasang, maplés, agangano
sakey, duara, taluran segundo
naiyanak

irapton inawit diad eges
siam ya bulán
manlapud bini
nanmalew ya ugaw

agni asumpal say panangaro
bimmaleg, nambalolaki
nanaral, nanasawa
wadtan nin mantagibi

manpasalamat ka anak
sakey labat so inam
manpasalamat ka met ed amam
antam la no akin.

Say pinalsa ed dalem na dayat

Onsipáksipák so daluyong ed pangpang na dayat
walay ugaw batik batik, mannaay-ayam
diad beneg na ermen ya malorem ya kabuasan
onoogip say pinalsa ed kaaralem na taew
mapalnan ontitikiab saray manok ed tapew
senga alinguanan ya panaon
ta abayag ya akadokol
mankugkugip ya buagen
mansasamit ed ambilonget ya papasén
bangta onbalikuat, abangon, mantayegteg so dalin!

Say Inarok

(parad si M.P.)

Andukey so andikit ya buik ton anggan abalá
say mataton masanting ya makabaláni
bibil ton gabay ton paanguban
lupa ton maganan agko nalinguanan
eléng ton maotok ya balibalin nengnengen
laman ton argolyotoy botelya na cola
say baog to'd bikking walay sansakey ya piglat
tan say beneg ya ataratar na balyanget
mansalita, manelek, onemes – makaiter ya kasil
maaro, maanus sikaton inar-arok
balet natan manaakis so asugat ya posok.

Abalang ya piráwat na panangaro

(parad si M.P.)

Nonot mo bii
Panonton abalang so piráwat tan dua
Ta agkamet makadandán ed razón tan alilingko
No agmo met tuan penerdona saray kasalananko
No agmomet gabay ya impawil ed siak.

Nonoten ko met
Panonton abalang so piráwat tan dua
Ta agtaka aboloyan ed nilooban mon moyong
Balet kimmerewak ed sika lay perdona
Ta gabay ko ni so impawil ed sika

Nonoten tan dua sirin
No walani so gunaét na panangaro tan dua
No kapigan tan manpawilan agko balet anta.

Sarayan anlong et entri ed Unan Paliagan na Anlong ed Pangasinan ya inisponsor na Komision na Dilan Filipino nen 2006. Saraya et kaiba na "Urduja" ya analon Honorable Mention. Unan naipalapag ed Makata: An online journal of Philippine & International contemporary poetry ed Disyembre 2007 ya paway to.