Top Ten Universities

Saraya et unaan ya sampluran unibersidad ed intiron talba. Say University of the Philippines et tapuac. Pano nid arom ya unibersidad ey? Makapakelaw ta si Roman ya presidente na UP et ag to insali ed sayan survey so UP. Nayarin antato ya onbeba lamet so ranggo na UP. Wais met ta anta ton sakey ya pakanengnengen komon ya no maong so administrasyon to no iparis ed si Nemenzo.

1. Harvard University
2. University of Cambridge
2. University of Oxford
2. Yale University
5. Imperial College London
6. Princeton University
7. California Institute of Technology
7. University of Chicago
9. University College London
10. Massachusetts Institute of Technology

Walay anemiran sukatan ya inusar na Times Higher Education Survey 2007: peer review score, recruiter review score, faculty student score, citations per faculty score, international faculty score, international students score. Diad otet ya talura, antoy ilaban na UP ey? Diad mikapat, siopay taga-UP ya angiletneg ya sakey ya teorya ya uusaren da ray propesor ed intiron mundo? Anggapon balot. Anggapo ni ingen soy akasalampat ya Nobel ed siyensiya, litiratura etc. Irayan eskuelaan et diad campus da ra, wala iray mannaakar ya singa ordinaryon totoo balet ed katuaan et Nobel prize winners.

Ipapanengneng to labat balet yan listaan ya saray maaliguas ya banbansa et prioridad day produksiyon ya kakabatan, say edukasyon. Ibabaga to met ya say edukasyon et akasentro nid saray bansan nangiyulo'y kolonyalismo. Saray asakop ya baley et aralem so epekto na kolonyalismo tan imperyalismo ta anggad natan et kontrolado ira na saray mayayaman ya baley. Satan so tatawagen dan imperyalismod kultura. No omamengen say listaan et natalosan tayo ya sarayan unibersidad et nanlapud Nansakey ya Es-Estado [Estados Unidos] tan Nansakey ya Nanarian [Reino Unido] saray ibabagaran oley na Anglo-Amerikano. Siopa'y angibagan asumpal lay imperyalismo?