COMELEC: Akankasalanan no akin marutak so kaliberliber ed sayan iliksion

Diad inkakapoy na COMELEC, ag to napatonda ra'y somlang ed ley na panagbotos singa iramay angkakabaleg ya poster, nambabangil ya pasen ya panpepeketan, saray sinmobra la ed TV ads.

Akin mairap so manpaseminar ed saray mankakampania nipaakar ed saray nayari tan ag nayari ed saya'n iliksion sakbay na campaign period?

Akin ag to sarag ya mangiter ya pamadosa ed sarayan onsosomlang ed ley?

Andi. Ta irayan opisial na COMELEC tan anggano saray wala'd beba diad probinsia tan baley, mureng ira tan inutil.

Agra, say abogado'n abogago, ikal ka'd tan ed DOJ!

Diad otang ed linawa nen Agra ed si GMA ya sikato'y inyaman to tan intagey to'd betang ed gobierno, nasarag to'y mantila anggano naikal sikato ed inkaabogado to, andi inkaabogago to.

Anggano ag ka manaral ya ley, nanengneng mo la ya wala'y betang daraya'n Ampatuan ed agawa'n baleg ya krimin.

Natan no sika et wala'y otang ed linawa ed saray Ampatuan, anggano imulagat mo'y mata'm et nanengneng mo la ya wala'y betang da ed saya, siansian ag mo iyaboloy ira'n ipila ed asonto. Tan no sika et aso-aso na pangolo ya antakot ed ibelyaw dara'y Ampatuan nen 2004 ya iliksion, ikalen mo ira ed listaan.

Satan so ginawa nen Agra.

Makapal so lupa to ya no ag sikato onikal ed DOJ. Kunsabagay, sikato'n inyorong sikato nen GMA ta atan so gaween to. Tsk tsk tsk.

Ta ambisioso ka'n manmaliw ya pangolo na DOJ, atan so nala'm. Balet ikal ka'd tan ta pinatey mo'y katunongan na baley.

Saray matila'n presidential spokesmen

Say kuandara'y tagasalita nen GMA, anggapo kono'y pibabali nen  Arroyo ed pasia nen Agra nipaakar ed pangikal na asunto ed duaran Ampatuan diad agawa'n masaker diad Maguindanao. Siopa'y lokoen yo ey? Odino diad inkamoreng yo, sikato'n inyan da kayo'd tan?

Amin ya pasia na manooley ed saray dipartaminto, ondalan ya ondalan ed say pangolo ta sikato so mamapasia.

Odino sakey met ya mureng ya'n pangolo?

No anto'y inpasia nen Agra diad Maguindanao masaker, say natetel si Arroyo.

Sikato'n matila iraya'n tagasalita nen GMA. No anto'y kiew, sikato met so bonga to, awa?

COMELEC, OTC Paper Supply nen Henry Young: Ballot secrecy folder, manisia kayo'n P380?

Agay lay mabli na ballot secrecy folder! P380 balang sakey! Makaayew ka'd COMELEC tan OTC Paper Supply ed sayan pikewet ya kontrata.

Diad inkasiba da ed kuarta, singa sara-sarag da'n lokoen so totoo.

Pigara kasi so apag daray miembro na COMELEC en banc ya angiter ya bindision ed saya? Pigara met kasi so apag nen Jose Tolentino? Akin tanga ya'y si Jose Melo ya ag da kono sinukay ya maung so kontrata?

Manisia kayo ballot secrecy folder P689.7 milion?

Agi, magsi-awit ti la labat la ya folder kasabi iliksion. Balet saray akibiang ed saya, ikolong ira. Andi, ipapaltog ira ed sakey ya firing squad. Walaak ed gilig ya manbantay.

Siopa'y ibotos ko natan ya iliksion?

1. Saray mangusar na salitan Pangasinan ed saray campaign posters da.
2. Saray mansasalita'y Pangasinan ed campaign speeches da.
3. Saray onaabuloy ed pangusar na Pangasinan bilang salita ed panagbangat ed iskuilaan.
4. Saray mangiyulo na tugtuwan kultural ya rinasimiento na Pangasinan.
5. Saray makatalos na linawa na baley.
6. Saray makaamta ed ibolaslas na baley.
7. Saray maung ya mankimey ed iyabig na baley.

PNP Chief Versoza ed malinis tan patas ya iliksion: Kaokolan to so suporta'y baley

Likod ed samay iskandalo nipaakar ed saray tatawagen ya "Euro Generals", saya'y inpaawet nen PNP Chief Jesus Versoza ya pansiansiaen to so mandato na PNP ed panangiyapiger na malinis tan patas ya panagbotos et baleg la'n ipatawir to ed siopaman ya ontombok ed sikato.

Kaokolan to'y suporta na totoo natan ya ag to labay so onabuloy ed getma na Malakanyang.

Saludo ak ed pasia to'n onboba ed puisto to kasumpal na Hunio 30 bilang pangiter to'y galang ed ontombok ya prisidinti.

Kaokolan ya ikalen so Malaysia ed GRP-MILF peace talks

Kaokolan ya ontonda so gobierno na Malaysia ed pibabali to'd GRP-MILF peace talks ta wala'yconflict ed interest da nipaakar ed Sabah. Say Sabah et sakey ya dalin ikikinon na Pilipinas ya wala natan ed tiritorio na Malaysia.

Akin ta piliten ya iseksek na Malaysia so dili to no onia so kipapasen na relasion na Malaysia tan Pilipinas? Ta piano kasi naamtaan to so antokaman ya pamaakaran na GRP-MILF nipaakar ed Sabah?

Duga si Sinador Biazon ya kaokolan ya ikalen odino onikal so Malaysia ed sayan pitongtongan na GRP-MILF. Balet say MILF so mapilit. Akin kasi? Sikara kasi so pangaalaan na armas daray miembro to?

Akin ta intirisado nin siansia so Malaysia ed tongtongan na GRP-MILF?

Nanenengneng dan nayarin usaren so MILF ta piano linguanan na GRP so pibibiang to ed Sabah ed panamegley na pansuporta ed pilalek na MILF ya onalis so Mindanao ed oley na gobierno'n Pilipino.

Maung nin katongtongen so Indonesia tan The Netherlands ya onalagey ed sayan peace talks.

Iligal so panangibetang nen GMA ed si Yuchengco!

Sesebelan na sangkatageyan ya ley so pangolo na mangibetang duaran bulan sakbay na panagbotos.

Aliwa labat ya aya. Akin ta mangibetang kay imbahador natan ya duaran bulan labat la et iliksion la? Ag ni ampetang so impanyorong to'd irongan, kaokolan sikaton manpatanir ta wala'y balon pangolo. Sakey ni, no tugtuwa ka'n ikonomista, mabli tan magastos no salatan mo so sakey ya career diplomat ya bigla-bigla. Ompano so isip to et ag la onbeba ed poder ya nayarin si Yuchengco ni so imbahador kasumpal na Hunio 30?

Balet no ikalen mo'y Delia Albert ya maronong ya diplomat ya ag ka ni nanpatanir, anto ka kasi'n pangolo?

Bastos tan tanga.

No aliwa so getma to ya'n impanbetang, sakey ka'n buanges ed oley.