Featured Post

Say Pangasinensen ngalngalin nanmaliw ya pangolo na bansa: Si Carlos Peña Romulo (1898-1985)

Nipaakar ed sayan talintao. Say inpansamba nen Carlos P. Romulo ed arap nen Pangolon Manuel Roxas nen 1946. Walad kawanan si Speaker of th...

Oct 20, 2012

ABS-CBN 32 Dagupan tan GMA Dagupan, managpatey na salitan Pangasinan odino manangitanduro na impiryalismon Tagalog!

Iray Pangasinan makapoy so pililikna da ed salita ya pamabirbir ed inkasika da. Say Pangasinan labat so aliwan regional channel lapud say sasalitaen da ed news broadcast da et aliwan Pangasinan balet Tagalog.

Onpapatey la lanti so Pangasinan lapu lantid inkamatalunggaring na Tagalog, Inglis tan Iloko, ag ni nabantayan ed TV.

Abayag ko lan gabay ya ibelyaw ya ed sayan blog ta kada ngarem so narerengel ko et Tagalog diad tv ya ag nagawa ed Laoag ta Iloko diman, diad San Fernando ta Kapampangan ira, Bikol diad Bikol, Ilonggo diad Iloilo tan arum ni ra. Makapasiodot tan makapageget no akin onia so nagagawa ed Pangasinan.

Say ABS-CBN Dagupan labat so niduma ed intiron regional channels na sayan istasiyon ta say riportahi da et Tagalog.

Say padisir ko saray manbebenben ed sayan istasiyon no aliwan Pangasinan et Ilocano odino Tagalog.

No man-interbyu ni rad saray totoo ed ibabalita da et Tagalog.

Makapabaing ni so GMA ta so makinggawa et taga-Pangasinan - iray Jimenez. Naitdan ni na ASNA award na provincial government na Pangasinan. Ompano sikara et ag da amtay man-Pangasinan odino Ilocano ira.

Panon ton nabangatan iray ilalak odino iray Ilocano ya anggad natan ag da amta so man-Pangasinan?


Mureng ira ya ag da amta ya MLE la so pamakaaran na DepEd.

Diad apalabas ya GMA Balitang Amianan ya si Jorge Guerrero so manbebenben, wala ni ray ugugaw ya Pangasinense ya konwarin manriport et nabirbir so inkaPangasinan da ed panagsalita da. Akin ag la salitan Pangasinan so inusar da imbis ya Tagalog? Lapud say kanonotan na management et mas maung kan Pilipino no say amtam ya salita et Tagalog.

Ed arum ya salita, say mass media so numiro uno ya managpatey na salitan Pangasinan.

Siopa iray kabusol na salitan Pangasinan?

1. Iray atateng ya Pangasinan ya ibangat da ni iray anak da ed Tagalog. Walay kabat kon taga-San Carlos ya manaaral ed UP ya ag to amtan balot so Pangasinan. Makabaing ya tua!

2. Iray Ilocano ya manbebenben ed sarayan istasiyon ya lapu lantid say kanonotan da et Ilocano ira tan dakel so arum ya totoon nambabangil dia ed Pangasinan sikaton itandoro da so Tagalog. Pekewet ya rason.
Pano iran nabangatan na Pangasinan ta wala lanti ra dia ed Pangasinan no ag da nadedengel so Pangasinan odino nababantayan?

3. Iray Pangasinan ya ibaing da so salita da ya anggano pariho iran Pangasinan et labay da nin man-Ilokano odino man-Tagalog.

4. Iray opisial na gobierno lautlad Pangasinan ya anggapon balot so pakabirbiran ya Pangasinan so probinsia ed website singa say official website na Pangasinan provincial government.

5. Iray totoon say kanonotan da et say Pangasinan et Pangalatok ya ibabawag da ni ya ag da amta ya sayan salita et balaw daray Ilocano ed saray Pangasinan. Amay website na Philippine Information Agency abayag lan walad webpage banner da so Pangalatok.

6. Say gobiernon Pilipino nen diktador tan corrupt ya Ilocano ya si Ferdinand Marcos ya angiletneg tan nanpangaran na Region 1 bilang Ilocos Region ya pinatey to ya so pamabirbir ya Pangasinan. Iray manguusar ed sarayan ngaran ya Ilocos Region odino Ilocandia. Kaokolan ya salatan yan ngaran.

7. Iray mamaistra tan mamaistro ya itandoro da ni so Tagalog nen say salitan Pangasinan.

Diad Urdaneta, no onlaak ed baley mansasalitaak na Pangasinan ed saray tricycyle driver pian onpatey so kanonotan ya soy Urdaneta et Ilocano. Singa "dia la" odino "diman ay" etc.

No makapoy so pakabirbiran daray Pangasinan ya singa isoko da la so salita da ed Tagalog odino Iloco, antoy pansumpalen da ey? Onkapoy so panangaro dad nanlapuan da. Ontan met onmelag so pililikna da ed baley da.

Nen inaksubi daray Pangasinan nen 1912 so inkaPangasinan da tan intandoro da so salitan Pangasinan, abilay so salita, inmaliguas so probinsia tan nipalagey so sangkarakepan ya kapitoliyo ed Lingayen. Irayan totoo et sikara di Pedro Ma. Sison na Urdaneta ya nanmaliw ya Sinador na sigundo distrito, Daniel Maramba ya taga-Sta. Barbara sikatoy gobernador ya nanpalagey na kapitoliyo, Angel Ungson, Manuel Moran ya taga-Binalonan ya nanmaliw ya chief justice na Supreme Court, Pablo Mejia tan arum ni ran gagalangen ya Pangasinense. 

Akin kaokolan so regional channel ed salitan Pangasinan?

Atayak so poli na Pangasinan ed probinsia na Pangasinan ya wala ray totoon Pangasinan ed ibabaga ran Ilocano singa diad Urdaneta ya kulaan ko, Tarlac, Pampanga, Nueva Ecija, Benguet, La Union, Zambales, Metro Manila tan arum ni ran probinsia.

Itdan na subtitle pian natalosan daray arum ya totoo no say paga da et ag natalosan daray Ilocano, etc.

Akin say nonoten et iray arum ni? Nanayam ira dia ed Pangasinan sikara ni so kaokolan ya itday konsiderasiyon? Diad sayan nagagawa iray Pangasinan et nanmaliw ya second-class citizen ed dili dan probinsiya.

No walay manaayam ya Pangasinan kasi ed Laoag odino Vigan salitaen da kasi so Pangasinan odino Tagalog ed saray news broadcast da ed TV pian ag kababaing ed saray Pangasinan? Andi.

Sikaton bangon ka la Pangasinan! Odino labay mon pateyen da ka pian manariy arum ya salita?

Bantog Iran Post