Featured Post

Say Pangasinensen ngalngalin nanmaliw ya pangolo na bansa: Si Carlos Peña Romulo (1898-1985)

Nipaakar ed sayan talintao. Say inpansamba nen Carlos P. Romulo ed arap nen Pangolon Manuel Roxas nen 1946. Walad kawanan si Speaker of th...

Dec 19, 2010

World-class stadium ed Pangasinan, natan la!

Babantayan ko natan so mikaduan laban na Pilipinas tan Indonesia ed football. Akasakey lay Indonesia. Say epekto na totoon manbabantay et baleg ya tua. Hometown crowd kuanda.

Panon makapanpalagey na marakep ya stadium so Indonesia balet so Pilipinas ag to sarag?

Dapot saray politiko dia say amta da labat manpalagey na waiting shed. Anggano si Raul Roco ya linmaban ya pangolo et saya so dakerakel ya inpalagey tod Bikol ya ataratar konoy ngaran to. Ag ko amta no tugtuwa ya.

Natan ya walay aliwawaan ya lidirato ed Pangasinan, panaun la ya manpalagey ya world-class stadium inerman ed poso na luyag.

Unaan la na Pangasinan so arum ya probinsia ed pamabulaslas na pakasilan. Natan la!

Baleg ya tolong ya ed turismo. Iyan tod mapa na mundo na pakasilan so Pangasinan.

Dec 13, 2010

Obama kapara to met si Bush Jr.

Siopa man so onirong ed White House, kanen sikato na pamakaaran na abayag lan manbibilay ed sakey ya bansan niyanak ed impirialismo nen taon ya sinakop toy Pilipinas.

Ontan si Bush Jr.

Ontan met si Obama.

P-Noy, makapoy

Diad agawan massacre daray taga-Hong Kong ed Manila, inpanengneng nen P-Noy so inkakapoy to.

Ag mo naimanon nagawa ya ed embeneg ya administrasion.

Diad sayan ag impandago na Pilipinas ed pangiter na Galang ya Nobel (anggano sayan galang et ag ko itday kabaleg ya importansia lapud anggapo ni Pilipino so naitdan na sayan galang), inpanengneng nen P-Noy so inkakapoy to.

Say kuanen P-Noy diad saman ya agew inasikaso na Department of Foreign Affairs so intiris daray Pilipino ya nikolong diman ed Tsina lapud drug trafficking. No siak, akin tolongan mo rayan totoo, anggano Pilipino ira, no say ginawa da et katupag toy patey? Kaokolan ni ingen ya ibaing ira.

Salamat ta ag ko inbotos si P-Noy balet aliwan salamat ta kaokolan kon mananos ya limaran taon nin panimatonan na inkakapoy nen P-Noy.

Nov 28, 2010

Ikalen so proteksionismo?

Say aso-aso na World Bank ya si Jesse Ang labay ton ikalen na gobierno so polisiya ed proteksionismo ta aya la kono so rason no akin ta ag makalaban saray industriya dia ed industriya daray arum ya bansa.

Labay nen Ang ya pateyen so industriya diad Pilipinas.

Labay nen Ang ya so minabang ed ikonomiya na Pilipinas et saray sangkaili.

No saray arum ya mayayaman ya bansa et iyagel day industriya da, say Pilipinas ya mairap ya bansa, say gusto nen Ang, ilukas to niy puerta ton maung ya maung lan binagbag yan puerta ta piano anggapo la makasbel ed panagloob da.

Natan, pigara kasi naaawat nen Ang ya suildo ed World Bank sikaton say bilay na milyon ya Pilipino no ikalen so proteksionismo et singa anggapoy pibabali to?

Pabiskegen saray industriyan Pilipino ya miampar ed kalidad na Hapon, Korea. Looban na Pilipino saray industriyan saray sangkaili labat so minanabang. Ibangat iray Pilipinon manaliw ed saray produkton Pilipino. Onia komon so nagawa aliwan satay itatandoro nen Ang ya bosis na World Bank ya abayag lan nanpairap tan manpapairap ni ed saray Pilipino.

Say Pasirayew ya Malapati

Mangaliw kila ya sangkaunaan ya librod para ugugaw ed salitan Pangasinan.

Tagano ed Kelang: Tinugiop iran Koritan na Pangasinan Natan

Say sangkaunaan ya antohiya na kontimporarion litiraturan Pangasinan. Mangaliw ki la!

Jul 6, 2010

ex-Chief Justice Davide, sakey met ya makapal so lupa

Hilario Davide, pangolo na Truth Commission?

Oliten: Davide, pangolo na Truth Commission?

Anggapoy indumaan nen Davide ed si Alberto Romulo.

Inpabetang nen GMA ed si Davide so Permanent Representative ed UN. Ag la kontento ed agamor ton sangkatageyan ya betang ed Korti Suprima, sinublay to ni so betang daray career ambassadors ed UN. Anton klasin ex-chief justice ya ey? Sakey met ya buanges ed oley.

Natan si PNoy initdan to lamet ya betang ed Truth Commission. Makapalek.

Davide, Truth Commission? Agay lay kapal.

Akin anggapoy panliketan daraya ya masiken la ag la manritiro?

Panoy kapal na lupa nen Alberto Romulo?

Makapal so lupa nen Alberto Romulo. Natan ibaga yo pa ed siak no anto so pidumaan na "foreign policy" nen GMA ed si PNoy natan ya pinansansia nen PNoy si Romulo?

Ed pigaran inmirong ed DFA, pigaran Romulo la so nanbenben ed inka-secretary? Akin gaway pamilya Romulo so DFA?

Say inpanbetang ed si Romulo et sangkabalgan ya lingo ed administrasion nen Aquino.

Siopay natolok, so Atsi to Ballsy ya mureng, ag to amtay nagagawa ed DFA? O saray makaamta ed "foreign policy"?

Makapal so lupa nen Alberto Romulo. Makapal ya kapara nen pangamaen ton si Carlos P. Romulo.

No antoy inkakapal na palitada na DFA building ed Roxas Boulevard, ontan so lupa darayan sanpangamaen.

Kris Aquino, First Lady?

Akin inbana nen Kris Aquino so pansian dan sanasawa sakbay ed inagurasion nen agi ton pangolo? Diad agew na inagurasion, akin sikato labat so duma ed kawes daray atsi to?

Sakey labat so labay ton ibaga ya. Onpoposision lay Kris Aquino ya manmaliw ya First Lady. Andi kari?

May 22, 2010

Koala Bear, nanlapuan mo?

Akin pinmaway si "Koala Bear" natan ta asingger la'y isusumpal na panagbilang ed botos daray pangolo tan kumaduan pangolo?

Ta piano diralen to so kridibilidad na iliksion?

Lagi.

Duara labat so nayari'n panlapuan mo: Malacañang odino diad sakey ya abung ed Polk St.

Kamatis ya inaplosa'y gas odino pormalin?

Say tinirak ya kamatis masamit ya ipangan ed antokaman ya buagen singa prito'n sira balet no makataway ka'y singa samal, naikal so samit ed panangan.

Ta onia so kipapasen dara'y ilalako'n kamatis diad Pangasinan lautla'd Urdaneta ya manlalapud arum ya baley.

Aaplosan da'y gas odino pormalin saray kamatis.

Sikaton irayan managlako'y kamatis, imbis ya makaiter ya sustansia somlang ed cancer so kamatis, say kamatis so mangiter na sakit ya cancer.

Sikayon suitik ya managlako'y kamatis, itonda yo pa la yan sinusuitik ya kagagawa ta iyaasingger yo'd piligro so baley!

Say belas ed Pilipinas (diad Pangasinan) aliwan pang-iksport

Masamisamit lay panangan mo et wala'y aketket mo'n bato. Kaokolan mo'n ipaway ed sangi ta aliwa met ya makakan ka'y bato.

Atan so sengeg no akin ag sarag na belas diad luyag ya ilako ed paway na bansa.

Ag mo naimano'n nagawa ya ed Korea, Hapon ta aliling toy ansakket so kakanen dan belas.

Say rason et ipaagew da ed kalsara saray ilik ya pamagaan.

Anggano andi lan ilako'd paway na bansa, akin ag sarag ya malinis so belas ya ilako diad tindaan bilang pamagalang met ed saray totoo'n mamanga'y niluto?

May 11, 2010

Aga manepeg ed siak so pangolo yo!

Inbotos na Pilipino so sakey ya makapoy ya pangolo. No anto'y gobierno, sikatora'y totoo kua'y Rizal. Ompano sayan pangolo so onsarag ed walna daray Pilipino. Balet aga manepeg ed siak so pangolo yo!

May 10, 2010

Gilbert "Gibo" Teodoro, pangolo na Ripublika na Pilipinas

Si Gibo labat odino anggapo.

Ag nayari'n ipia so Pilipinas ed makapoy (Noynoy), ed matakew (Villar), ed atagey so paltik to (Gordon), ed nakal la (Erap).

Amtak sikato labat so kwalipikado ed panagbotos na pangolo.

Tan sikato so manalo.

Sikato so analo.

May 6, 2010

Smartmatic, Comelec kasoan ya electoral sabotage!

Ipila met la dia si GMA.

Paelek-elekan lamet so Pilipino ed mundo. Say mangiyoyolo na iliksion, sikato ni so mangiyolo na sabotahi.

Pano'n saray PCOS machines ag ni ra sinobok sakbay iran ipawit ed saray probinsia?

Getma na Smartmatic kasi ya nagawa ya'n lingo piano natoloy lamet so panagbotos ya di-mano so panagbilang piano makapansaol lamet? Odino nitantan lamet so panagbotos ya sikato'y labay na wala'd oley? Siopa'y angiganggan ed sikara ya onia so gaween da?

Sakey lamet ya'n parti na sakey ya baleg ya apinonong dara'y akairong ya labay da'n ag natoloy so iliksion.

No ontan, kasoan so Smartmatic. Pipawil ed gobierno so binilion ya gastos ed sarayan PCOS machines. Salatan saray totoo ed COMELEC!

May 1, 2010

Say ibotos ko ya sinador

- aliwan tradisional ya politiko
- talaga'n miembro na tugtuwa'n oposision
- malinew ya inaro to so baley to

Siopa iraya?
1. Risa Hontiveros Baraquel
2. Satur Ocampo
3. Liza Maza

Iter ko met so botos ko ed duaran taga-Pangasinan

4. Raul Lambino
5. Joey de Venecia III

tan diad duaran bitirano'd politika

6. Franklin Drilon
7. Miriam Defensor-Santiago

Say duaran masilib ya ibotos ed inkapangolo:

1. Gilbert Teodoro
2. Dick Gordon

Apr 22, 2010

COMELEC: Akankasalanan no akin marutak so kaliberliber ed sayan iliksion

Diad inkakapoy na COMELEC, ag to napatonda ra'y somlang ed ley na panagbotos singa iramay angkakabaleg ya poster, nambabangil ya pasen ya panpepeketan, saray sinmobra la ed TV ads.

Akin mairap so manpaseminar ed saray mankakampania nipaakar ed saray nayari tan ag nayari ed saya'n iliksion sakbay na campaign period?

Akin ag to sarag ya mangiter ya pamadosa ed sarayan onsosomlang ed ley?

Andi. Ta irayan opisial na COMELEC tan anggano saray wala'd beba diad probinsia tan baley, mureng ira tan inutil.

Agra, say abogado'n abogago, ikal ka'd tan ed DOJ!

Diad otang ed linawa nen Agra ed si GMA ya sikato'y inyaman to tan intagey to'd betang ed gobierno, nasarag to'y mantila anggano naikal sikato ed inkaabogado to, andi inkaabogago to.

Anggano ag ka manaral ya ley, nanengneng mo la ya wala'y betang daraya'n Ampatuan ed agawa'n baleg ya krimin.

Natan no sika et wala'y otang ed linawa ed saray Ampatuan, anggano imulagat mo'y mata'm et nanengneng mo la ya wala'y betang da ed saya, siansian ag mo iyaboloy ira'n ipila ed asonto. Tan no sika et aso-aso na pangolo ya antakot ed ibelyaw dara'y Ampatuan nen 2004 ya iliksion, ikalen mo ira ed listaan.

Satan so ginawa nen Agra.

Makapal so lupa to ya no ag sikato onikal ed DOJ. Kunsabagay, sikato'n inyorong sikato nen GMA ta atan so gaween to. Tsk tsk tsk.

Ta ambisioso ka'n manmaliw ya pangolo na DOJ, atan so nala'm. Balet ikal ka'd tan ta pinatey mo'y katunongan na baley.

Saray matila'n presidential spokesmen

Say kuandara'y tagasalita nen GMA, anggapo kono'y pibabali nen  Arroyo ed pasia nen Agra nipaakar ed pangikal na asunto ed duaran Ampatuan diad agawa'n masaker diad Maguindanao. Siopa'y lokoen yo ey? Odino diad inkamoreng yo, sikato'n inyan da kayo'd tan?

Amin ya pasia na manooley ed saray dipartaminto, ondalan ya ondalan ed say pangolo ta sikato so mamapasia.

Odino sakey met ya mureng ya'n pangolo?

No anto'y inpasia nen Agra diad Maguindanao masaker, say natetel si Arroyo.

Sikato'n matila iraya'n tagasalita nen GMA. No anto'y kiew, sikato met so bonga to, awa?

Apr 8, 2010

COMELEC, OTC Paper Supply nen Henry Young: Ballot secrecy folder, manisia kayo'n P380?

Agay lay mabli na ballot secrecy folder! P380 balang sakey! Makaayew ka'd COMELEC tan OTC Paper Supply ed sayan pikewet ya kontrata.

Diad inkasiba da ed kuarta, singa sara-sarag da'n lokoen so totoo.

Pigara kasi so apag daray miembro na COMELEC en banc ya angiter ya bindision ed saya? Pigara met kasi so apag nen Jose Tolentino? Akin tanga ya'y si Jose Melo ya ag da kono sinukay ya maung so kontrata?

Manisia kayo ballot secrecy folder P689.7 milion?

Agi, magsi-awit ti la labat la ya folder kasabi iliksion. Balet saray akibiang ed saya, ikolong ira. Andi, ipapaltog ira ed sakey ya firing squad. Walaak ed gilig ya manbantay.

Siopa'y ibotos ko natan ya iliksion?

1. Saray mangusar na salitan Pangasinan ed saray campaign posters da.
2. Saray mansasalita'y Pangasinan ed campaign speeches da.
3. Saray onaabuloy ed pangusar na Pangasinan bilang salita ed panagbangat ed iskuilaan.
4. Saray mangiyulo na tugtuwan kultural ya rinasimiento na Pangasinan.
5. Saray makatalos na linawa na baley.
6. Saray makaamta ed ibolaslas na baley.
7. Saray maung ya mankimey ed iyabig na baley.

PNP Chief Versoza ed malinis tan patas ya iliksion: Kaokolan to so suporta'y baley

Likod ed samay iskandalo nipaakar ed saray tatawagen ya "Euro Generals", saya'y inpaawet nen PNP Chief Jesus Versoza ya pansiansiaen to so mandato na PNP ed panangiyapiger na malinis tan patas ya panagbotos et baleg la'n ipatawir to ed siopaman ya ontombok ed sikato.

Kaokolan to'y suporta na totoo natan ya ag to labay so onabuloy ed getma na Malakanyang.

Saludo ak ed pasia to'n onboba ed puisto to kasumpal na Hunio 30 bilang pangiter to'y galang ed ontombok ya prisidinti.

Apr 7, 2010

Kaokolan ya ikalen so Malaysia ed GRP-MILF peace talks

Kaokolan ya ontonda so gobierno na Malaysia ed pibabali to'd GRP-MILF peace talks ta wala'yconflict ed interest da nipaakar ed Sabah. Say Sabah et sakey ya dalin ikikinon na Pilipinas ya wala natan ed tiritorio na Malaysia.

Akin ta piliten ya iseksek na Malaysia so dili to no onia so kipapasen na relasion na Malaysia tan Pilipinas? Ta piano kasi naamtaan to so antokaman ya pamaakaran na GRP-MILF nipaakar ed Sabah?

Duga si Sinador Biazon ya kaokolan ya ikalen odino onikal so Malaysia ed sayan pitongtongan na GRP-MILF. Balet say MILF so mapilit. Akin kasi? Sikara kasi so pangaalaan na armas daray miembro to?

Akin ta intirisado nin siansia so Malaysia ed tongtongan na GRP-MILF?

Nanenengneng dan nayarin usaren so MILF ta piano linguanan na GRP so pibibiang to ed Sabah ed panamegley na pansuporta ed pilalek na MILF ya onalis so Mindanao ed oley na gobierno'n Pilipino.

Maung nin katongtongen so Indonesia tan The Netherlands ya onalagey ed sayan peace talks.

Apr 4, 2010

Iligal so panangibetang nen GMA ed si Yuchengco!

Sesebelan na sangkatageyan ya ley so pangolo na mangibetang duaran bulan sakbay na panagbotos.

Aliwa labat ya aya. Akin ta mangibetang kay imbahador natan ya duaran bulan labat la et iliksion la? Ag ni ampetang so impanyorong to'd irongan, kaokolan sikaton manpatanir ta wala'y balon pangolo. Sakey ni, no tugtuwa ka'n ikonomista, mabli tan magastos no salatan mo so sakey ya career diplomat ya bigla-bigla. Ompano so isip to et ag la onbeba ed poder ya nayarin si Yuchengco ni so imbahador kasumpal na Hunio 30?

Balet no ikalen mo'y Delia Albert ya maronong ya diplomat ya ag ka ni nanpatanir, anto ka kasi'n pangolo?

Bastos tan tanga.

No aliwa so getma to ya'n impanbetang, sakey ka'n buanges ed oley.

Mar 29, 2010

Villar: Pigara'y bawien mo no wala ka la'd poder? (Dios ag met komon nagawa)

Si Villar et sakey ya nigosianti.

No P1 bilyon so agastos to'd saya'y iliksion bilang poonan, pigara'n bilyon so nabawi to kasi no akayorong la sikato ed Malakanyang?

Say Dios ilaban to tayo komon.

Saray ag ibotos ya partylist

1. 1-UTAK ta alaen dan onalagey ed sikara si Angelo Reyes
2. Ang Galing Pinoy ya labay dan pilien si Mikee Arroyo
3. Batang Iwas Droga (BIDA) ta pro-GMA
4. Adhikain ng mga Dakilang Anak ng Maharlika (ADAM) ta pro-GMA
5. Agbiag Timpuyog Ilocano (AGBIAG) ta pro-GMA
6. Babae para sa Kaunlaran (BABAE KA) ta pro-GMA
7. League of Youth for Peace and Development (LYPAD) ta pro-GMA
8. Kalahi Advocates for Overseas Filipinos (KALAHI) ta pro-GMA

tan arum niran partylist ya onaalagey ed onbabatik ya kongrisista ya si GMA.

Ispiker na Abung daray Kongrisista? Kogkogipen mo labat tan GMA ta ag nayari'n iyabuloy na baley. Siamira'n taon ya inkapangolo, agka la onsawa?

ABS-CBN tan arum niran kompania'd TV, minanabang ed iliksion

Nen Marso 26 labat ginmapo so kampanya daray lokal ya kandidato. Akin balet onpapaway la so anunsio na sakey ya onbabatik ya miyor na Makati ed ABS-CBN ey?

Sinmobra la'y Villar ed airtime to ed TV. Balet akin ta nababantayan ni ray anunsio to ed TV ey?

Ag sarag kasi na sarayan kompania ya patondaen irayan anunsio no sinmobra la'd betang ya oras?

Say kua'y Kuarta: "Talk to me."

Mar 25, 2010

Manzano: Baleg ya lingo ed impanbatik nen Teodoro

Si Edu Manzano so baleg ya lingo ed politikal ya taktika nen Gibo. Akin?

Si Manzano ag to sarag so manalo. Anggapo'd suri to ya nayari sikaton man-bisi prisidinti. Sakey labat sikato'n popular ya artista'n manmaung-maungan.

Natalo sikato ed sayan onsabin iliksion.

Nayari ton igoyor si Gibo paleksab.

Si Manzano et sakey ya bagahi nen Gibo ya anggapo'y sirbi to. Maung la'n binmatik si Teodoro'n anggapo'y bisi to.

Angeles, Guevara, antakot ed saray ambagel ya istudianti

Onsosobra la'y lastog daray bomabasa ed UP tan PUP. Mapangta iran mangibantak na paintball ed opisina na CHED odino manpool na kagawaan diad PUP.

Iraya'n opisial balet so lalo'n makapabaing ta anggapo'y sibeg dan banoen tan ipanengneng da so awtoridad da ed arap daray arsonista tan akti-aktibista.

Diad sayan inaambagel ya kagagawa darayan istudianti, ataktakot ira.

Anto'y ipasabi to ya ey?

No ontombok ya taon, lalo'n naambagtit irayan istudianti ed kinapangta. Poolan da'y intiro'n iskuilaan.

Tan say kalidad na edukasion ed PUP, et aliwliwa la natan, lalo'n onaliwa.

Mar 24, 2010

Sankailin kompanian langis: Kabusol daray Pilipino

Saray sankailin kompanian langis ed Pilipinas: Shell, Petron, Caltex, sikara'y kabusol na bansa'n Pilipino. Kada tagey na prisio na langis, sikato'y iyayaman da, sikato'y iyiirap met na ordinarion Juan de la Cruz.

Sikaton sikara'y kabusol na Pilipino.

Kabusol met daray Pilipino saray onaalagey ya aso ya Pilipino daray kompanian langis. Sikara so mansasalita tan manamegley ed ibaga darayan Multinational Companies (MNCs). Minanabang ira ed atagey ya suildo.

Wala met saray kasosio'n Pilipino ya sikara so minanabang ed kada tagey ya prisio na langis. Stockholder amo amay wala'd oley na gobierno natan ed sakey ed saraya?

Ta piano ontonda so panaari darayan kompania, mananap tayo'y altirnatibo'd langis: inirhia'n manlalapu'd dagem, danum, singaw, daluyong tan agew.

Sikayo'n Pilipino'n sientista, igapo yo la'y mansukay ed saraya ta no andi, sarayan kompania opoten da'y pilak na baley.

Kaokolan so TFI: Siopa ray singeg ed poolan ed PUP?

Nabantayan ed TV so panselsel na apoy daray arum ya istudianti ed saray irongan diad PUP. Sasansangen da'y paraan ya itagey na wala'd oley na unibersidad say tuition fee.

Balet kaokolan ni ra kasi'n manpool ya gamit ed iskuilaan?

Pangolo'n Dante Guevara, akin pinolianan mo ra'n nagawa itan ed loob na kampus?

Saray mamaolo ed sayan golo, nepeg labat ira'n isuspindi. Nanmaliw iran maoges ya panaligan daray istudianti'n wala'd kalangweran lautla'd wala'd abeba tan atagey ya panbabasaan.

No aktibista ka'n onsosomlang ed autoridad ya wala ka'd nepeg mo'n alageyan, onaboloyak ed sika. Balet no arsonista ka, maong ni'n ikolong da ka'd pangawan.

Nasosobraan da lara'y manbabangat ed sarayan istudianti.

Diad sayan diniral tan pinoolan ya kagawaan na iskuilaan, manepeg labat ya itagey na PUP so tuition fee!

Mar 23, 2010

Paboritismo nen GMA, Dimoralisasion ed AFP

Diad inpanbetang nen GMA ed si Hin. Bangit ya Class 78, atilak saray mas sinyor ni ed si Bangit ed leksab ya miembro na Class 76 tan 77.

Wala'y labay ya lutoen na binari ed sayan getma ya immabuloy so hiniral ta labalabay to met ya irongan amay betang. No wala'y delicadeza tan galang nen Bangit ed saray matakken ni ed sikato'd taon, akin awaten to may betang?

Balet sayan lulutoen da wala'y naluluto met ya ag labay nen GMA ya nagawa ta ompano saya so singeg ya agto aboten so Hunio 30: dimoralisasion ed AFP.

Saya'n dimoralisasion komon so mangiter ya biskeg ed AFP lautla'd saray dimoralisado ya ag ira onaboloy ed maoges ya pilalek dara'y wala'd oley ed saya'y onsabi'n iliksion.

Ag napanpiaan si Noynoy nipaakar ed Hacienda Luisita

Dinmalan si Noynoy natan ya agew ed Pangasinan ta piano makala'y botos to'd saray masolok ya sakey milion ya Pangasinense. Bitbit to'y Kris ya makakailiw la ed Malakanyang.

Balet ag nayarin manalo'y Noynoy ed Pangasinan.

Sakey ya singeg: Hacienda Luisita.

Say kuanto no manalo'd iliksion bilang pangolo, say Hacienda Luisita et iter to la'd saray kasamak dima'd Tarlac ya mandadalos. Nitan balet may kapinsan to'n inbisuat to'd New York Times ya ag iter na pamilia Cojuangco so Hacienda ed saray dumaralos.

Siopa nata'y panisiaen?

No labay da'n tua ya iter itan, iter da la natan. Aliwan singa'd saya'y matila'n kiwas nen Noynoy.

Panisiaen da'y totoo lautla'd saray dumaralos diman ed Tarlac. No akayorong la ra ed poder, ilinguan da la ya'n promisa da.

Sikaton ag napanpiaan si Noynoy. No siak ag ko ipia so botos ko'd tila.

Mar 21, 2010

Nanlapu'd sangi na kabayo: Planas ed junta militar

Diad kuan da lanti'd Inglis, "straight from the horse's mouth", malinew so getma na sayan gobierno nipaakar ed panagbotos. Say kua'y Charito Planas, no ag natoloy so iliksion, nayari'n manoley so sakey ya junta militar.

Junta militar?

Aliwan kasi'n saya so labay ya nagawa daray wala'd poder?

Nonoten ti pa.

Aya'y krisis ed iliktrik sikato ya so paraan da ta piano ibelyaw da ya ag sarag so panagbotos ed Mindanao. Natan ta failure of election, onggalaw la so AFP ed panamegley nen Hin. Bangit ta piano iyorong so sakey ya junta militar. Kasumpal ya pigaran simba odino bulan, diralen da yan junta ta iyorong da la may amta yo la no siopa.

Junta militar sirin et ag arawi'n nagawa.

Balet no natoloy ya, anggano Dios ag da ti la ilaban!

Pinmawil lamet so gun for hire, akin ag da napatonda ya na PNP?

Sakey ya abogado na baley so pinaltogan da ed siudad na San Carlos.

Akin magano la'y manpapatey ed luyag? Akin kasi?

Ta say gun for hire et sakey la'n negosio dia ed Pangasinan.

No sayan krimin et koniktado ed panagbotos, natokoy langula saray partisan armed groups, saray pribado'n ngayew dara'y politiko.

PAG + Gun for hire = negosio tan golo.

Iner so panlalapuan darayan paltog? PNP, AFP, inposlit (smuggled) ya paltog.

No onia so kipapasen na probinsia, mananap ka la'y arum ya panayaman.

Mar 18, 2010

Say baleg ya panononong ed krisis ed iliktrik

Saya so otit ya baraha ed lima dara'y wala'd oley: say krisis ed kurienti.

Saray mamaolo ed saya:

1. Opisina na pangolo
2. Dipartaminto na Inirhia
3. NAPOCOR
4. National Grid Corporation of the Philippines

Sayan "grand conspiracy" ipanengneng to labat so kinakapoy dara'y sientista tan inhinyiro'n Pilipino.

Ag komon onabot ed sayan krisis no tugtuwa yan krisis no maung saray totoo tayo ed sarayan abitla'n ahinsia.

Ta say pankaokolan ed inirhia na sakey ya bansa et naimano la'd kuenta diad andi labat samplura'n taon; sarag ti manparles angga'd limamplo'n taon. Anggano sakey siglo nayari ingen.

Makapoy met saray ikonomista tayo numero uno la'd wala'd tagey.

Pano'm ya polian so inirhia ed paraan na ibolaslas na bansa ta aya so kaokolan na saray industria ta piano nagamora'n so progriso?

Amtak ya saya'n krisis et artipisyal.

Sikaton sikayo'n makaamta ibaga yo pa la. Ta say pasnok na totoo sabien da kayo no linoloko'y nagawa ed sayan panagbotos.

Oy, 1-UTAK mureng kayo no paolian yo'y Reyes ya mila ed sikayo!

Labay na 1-UTAK ya si Angelo Reyes so onalagey ed sikara ed Kongriso. Anto? Piolit yo pa. On, labay na 1-UTAK ya say promotor na panagtagey na gasolina so mangiwanwan ed sikara. Labay da'n say kasabwat dara'y kompania na langis so mangiyolo ed sikara.

Mureng kayo'n tua no ontan so labay yo! Odino diad dalem to ya kasabwat da ki met la ed paraan da'n gaween si GMA ya pangolon ministro?

Sirin, ag ti la ibotos so 1-UTAK lautla'n wadtan si Angelo Reyes!

Anggano labay tayo o andi, GMA kayarian to so mangibetang ed SC

Sarayan abogado, maung iran manggawa'y labir.

No siopa ra'y kaokolan ya manpaliwawa'd ley, sika ni ra so manpabilonget ed kanonotan dara'y totoo.

Makapakelaw so dikano na UP College of Law tan say Philippine Bar Association ed ibabagara'n maoges ed pasia na Sangkatageyan ya Okom.

Anggano labay tayo odino andi, sarag nen GMA ta wala'd poder to so manpili iyorong to bilang pangolon okom ed taluran nominado na Judicial and Bar Council. 

Hiniral Bangit: Manag-iter ya iligal ya ganggan si GMA?

"Agak ni akaawat ya iligal ya ganggan ed si Pangolo'n Arroyo," saya so inbaga nen Hiniral Bangit, say balo'n yorong ya AFP chief of staff ya initdan da'y betang ta sikato kono'y mangiyolo langula ed paraan ya onbayag ed oley si GMA.

Anto'y labay mo'n ibaga, Hin. Bangit?

Ya si GMA et managganggan ed iligal ya kagagawa? Ya manpasalamat ka ta agto ka ni initdan ya maoges ya ganggan?

Manalagar ka ed saya'n onsabi'n iliksion.

Bureau of Fire Protection, anto'y singeg dara'y pool?

Kada pool, nitan so BFP ya manerep na apoy san kasumpal mansukay no anto'y singeg. Balet kada sukay da, ag da nibaga'n diritsa no antoy nansingegan to.

Ibaga da ya nanlapu'd alinguanan ya aselselan ya kandila.

Odino ag  narep ya electric fan singa'd pool ed Mangaldan.

Tokoyen da met may daan ya electrical wiring.

Anto kasi kuya'n bombero? Akin ag yo aaralen iraya? Odino ngiras yo labat ya mankimey.

Mar 17, 2010

Sangkatageyan ya Okom, aso nen Arroyo?

Natan ya agew so impansingil nen GMA ed saray inyorong to'n okom ed Supreme Court.

Saray nanbayar ya otang ed linawa et sikara di:

1. Lucas Bersamin
2. Jose Perez
3. Roberto Abad
4. Martin Villarama
5. Teresita Leonardo-de Castro
6. Arturo Brion
7. Diosdado Peralta
8. Jose Mendoza
9. Mariano del Castillo.

Balet diad sangkatageyan ya ley, say kuanto'd  artikulo VII nipaakar ed ihikutibo, seksion 15:  "Duaran bulan kabebekta sakbay na ontombok ya panagbotos ed pangolo tan angga'd isompal na tirmino to, say pangolo odino onaalagey ya pangolo ag nayarin mangibetang, likod ed saray betang ya timporario ed posision ya ihikutibo no saray bakanti et diralen to so linkor ed publiko odino iyan to'd piligro so publiko'n kaalwaran."

Ag to sakop ya so pangibetang ed sangkatageyan ya okom.

Boxing bilang pakasilan na lapag ya bansa

Ontotolong ed ikonomia si Pacman. Diad $12 milyon ya dolyar ya inpaway na laban to'd si Clottey, baleg so nailoob to'n kuarta ed foreign exchange reserves na bansa.

Natan, gaween ti la'n national sport odino pakasilan na lapag ya bansa so boxing.

Imbis ya onbatik, si Pacman la mangiyulo ed panggamor ed sayan getma.

Manbangat tayo'y dakerakel ni ya Pacman ya manmaliw iran champion. Anggapo'y duaruwa, makatolong ira ed ikonomia.

Pacman, mandengel ka pa'd si Mommy D

No si Mommy D so natolok, ag to labay ya onbatik si Pacman ed sayan onsabi'n iliksion.

Mandengel ka pa'd Mommy D Manny.

Ag ka la mila'd mundo dara'y matila tan matakew.

Odino pitamitam mo met so mantila tan mantakew?

Tombok mo pa'y pilalek nen Mommy D Manny.

Mar 16, 2010

Nipaakar ed rilasion daray Pangasinan tan Ibaloi

Pinmaway may salaysay ko'n "Exploring the Pangasinan-Cordillera Connection: The Pangasinenses and the Ibalois" ed The Cordillera Review 1 (2) September 2009. (Say talintao nanlapu'd website na UP Baguio Cordillera Studies Center)

No siopa'y ibotos bilang gobernador na Pangasinan

Say mangitandoro ed iyabig na baley.

Say mangitandoro ed salitan Pangasinan.

Say manbilay na kulturan Pangasinan.

Say mansoporta ed litiraturan Pangasinan lautla'd saray sumusulat.

Wala kasi raya ed saray onbabatik?

Naliliknak singa anggapo.

Si Erap papawilen ti ni?

ANDILA.

Antoy nibagak ed si Villar?

C5.

Mar 15, 2010

Abril 5, pitsa'n inkaletneg na Pangasinan?

Dakel so tepet ed Abril 5, 1580 bilang pitsa'n impanggapo na luyag ya Pangasinan.

Anggapo'y tugtuwan historiador ed samay ulupan ya binoo da ed sayan panagsukay.

Pinaplesan da'y pandiklara ed sayan pitsa ta piano naipagamor so P 3000 anniversary bonus, andi kari?

Kris, no analo'y Noynoy

Ag ni analo'y kuya to ed inkapangolo, si Kris Aquino onkikiwas la'n singa riyna, binari.

Saya so ag ko labay ya naimatonan no analo'y Noynoy ta lalo'n onlastog si Kris.

Onpawil langula'y "Kamag-anak Inc." Wala'd Malacañang so sakey Riyna Rihinte ya siopa ni aliwan si Kris.

Sayan ripublika, manmaliw laingen ya monarkia.

Si Noynoy, linmugan labat ed ngaran ya atateng to

Anggapo'n balot so nanengneng ya kalidad na pangolo ed si Noynoy. Linmugan labat ed maltaw ya ngaran na atateng to: si Ninoy tan si Cory. Singa manaapura ta anggapo met ni nipanengneng to'd inkasinador to. Sakey salita: ambisioso.

Natan anto'y nibaga ed si Kris?

JC de los Reyes, say "conscience vote"?

Kua'y simbaan, si JC de los Reyes kono so "botos na linawa" ed sayan onsabi'n iliksion. Akin kasi? Si de los Reyes et anti-Reproductive Health Bill ya aalageyan na Simbaan ya Katolika.

Diad sayan posision, sikaran dua et laban ed progriso na bansa, kontra'd iyabig na totoo.

Sikaton no ag ibotos tan ag manalo si de los Reyes, tampal ed lupa na simbaan.

ASNA awards, asna nanlapu'd asin?

Natan ya Abril 2010, pagalangan saray maumaung ya Pangasinense ed antokaman ya katigoria ed tatawagen ya "ASNA awards."

Diad inpaway da'n ganggan, say "asna" kono et nanlapu'd daan ya porma na "asin" tan insita da ni may diksionario nen Lorenzo Fernandez y Cosgaya. No pawilen si Fernandez balet anggapo'y ibabaga to'n onia.

Revilla, Lapid, ag ti la panaloen!

Makapal so lupa darayan artista: Lito Lapid tan Ramon "Bong" Revilla Jr. Onbabatik langula ira ed Sinado bilang sinador.

Anto'y gagaween da ditan no ag manbotbot ya irungan say kua'y amak.

Tua itan.

Sikaton ag ti la ibotos.

Wala'd nonot da labat so P200 milyon ya CDF.

Gibo: No akin natalo

Marakep so plataporma nen Gilbert Teodoro balet:

1. say koneksion to'd si GMA so baleg ya bagahi.

2. saray ads to aga makakonikta ed saray totoo. Panon to ey ta say karaklan dara'y Pilipino ag ni tan ag makalugan ya iroplano.

3. makapoy so organisasion ya mankikimey ed panagbatik to.

4. kulang ed pilak.

Ompano onbawi sikato no agew ya eleksion.

Mar 14, 2010

Galila'd nukliyar ed Pangasinan balet...

Atrasado la'y Pilipinas ed tiknolohia'n nukliyar no ikumpara sikato ed arum ya bansa diad Abalaten-Bukig na Asya.

Diad Pangasinan, galila'd nukliyar balet kaokolan ya napriparaan saray atagey ya awiran ya mangiletneg na sakey ya Pangasinan Nuclear Research Institute [Awiran ed Panagsukay ed Nukliyar ed Pangasinan] ed singa Pangasinan State University ya manbangat ed saray sientista tayo'n manlapu'd Pangasinan lamlamang ed tiknolohia'n nukliyar. Sayan awiran et wala'y wayang to'n ag pisakop ed Philippine Nuclear Research Institute.

Itagey to yan awiran so kalidad na panagbangat tan panagsukay ed siensia lautla'd nukliyar ta piano makapansompal tayo'y sientista'n nukliyar ya taga-Pangasinan.

Polian ti la'y ibabaga na simbaan ya Katolika ta ag da amta'y pankaabigan na baley.

Pacquiao vs Clottey, aluto la?

Aluto la kono'y laban nen Pacquiao ed si Clottey. Saya so talabotob dara'y tomatraysikel tan arum ni ran managpasada'y jip, van tan bus. Balet no bantaya'y laban da mairap ya panisiaan ya ta diad boxing onaarap ka'd ibilay odino ipatey!

Mar 12, 2010

El Niño tan midia na baley ed TV: Maung iran manggawa'y paga

Diad kada lukas na TV no alas sais treinta, nitan lara'y balita nipaakar ed El Niño ya mantatalintao'd sakey ya baleg ya krisis. Natan no sika et manisia'n tampol, singa ka met la apatit ed pankokondision da'd linawa na totoo.

Saya'y El Niño komon et maganon naanapa'y polaing. Et makatolong komon iraya'y dam. Balet sarayan dam natan so baleg met ya sulit.

Lapud kapoy dara'y sientista tayo tan diad maoges ya getma daray politiko, sikaton ayan El Niño, et ugaw la lanti, et ag ti ni nabano.

El Niño tan saray dam: Akin ag da ibolos so danum ta piano nadanuman saray kalayan?

Aya'y El Niño abayag lan kipapasen na klima. Natan singa diad balita et balbaleg yan pakelaw ya manggagawa'y paga'd saray totoo.

Pati ray dam ya pangalaa'y danum ed irigasion et sinibelan da la'y pangipaway daray danum. Imbis sirin ya makatolong ira'd pamaranum na saray namamagan kaumaan ta danum lantin atipon ed mauran ya tiempo, natan anggapoy kakanaan da lamlamang.

Ibolos yan danum ta piano nabawasan so idiral na otiagew ed saray tanaman: pagey, mais, pising tan antokaman.

No kasabi lay nepnep tan bagio, sarayan dam so mansirbin palanggana'n mansingkat ed saray danum piano ag nadelap so luyag.

Diad pangisiblet day danum natan ta kaokolan so danum ed kapageyan, no mamauran la nitan langula'y delap.

Diklarasion na state of calamity, pangalaa'y kuarta'n ibolsa

Saya'y panay ya pangibelyaw ya wala'd desiang so sakey ya lugar et sakey ya pamaakaran ta piano magano'n nipaway so kuarta'n ibolsa odino usaren para'd saya'y eleksion.

Say ikakana da natan pian nagawa da yan getma ayay tatawagen ya El Ni ño ya salitaen ko'd ontombok.

Mar 10, 2010

Say simbaan ya Katoliko so samben ed RH bill, samben ed progriso na baley

Ipokrito ra'y simbaan ya Katoliko ed pankontra da'd Reproductive Health Bill. Labay da'y napansiansia so kairapan ed Pilipinas ed panaglobo na populasion na bansa.

No sikara so sinomlang nen Rizal, sikara natan so kaokolan ya somlangen.

Akin ta kaokolan ya dengelen irayan aka-bistida? Sikara kasi so manpabaleg na anak dara'y anak lan anak? Sikara kasi so mangiter ya trabaho ed sarayan ogugaw ya onbaleg ya mananap na kimey?

Andi.

Mindanao so pansaulan ed sayan eleksion

Ag ontonda'y brownout ed Mindanao. Anggapo'y tonda toya kono angga'd isabi botos. Aya so ibabaga nen Angelo Reyes. Nansalita la'y pangolo'n managtaktika nen GMA.

Agi, Mindanao langula so sintro na pansaulan da.

Saray makaamta ed sayan krisis ed korienti, mansalita la!

Mar 9, 2010

Brownout ya anak na lasin si Angelo Reyes

Brownout ya anak na lasin si Angelo Reyes!

Nen katantaon, inbaga nen Reyes ya natan ya taon et onsabi ra'y brownout. Amtak ya ikokondision da la so totoo diad sayan paraan da ta eleksion la.

Natan, managparles ya tua si Reyes ta tinmua may inbaga to. Brownout ya sakey oras, duara, talora...

No akin ta inyan da si Reyes ed Dipartaminto na Inirhia, aya lamet so makapakelaw ed saray kelaw ya kagagawa nen Arroyo.

Makapoy kasi ra'y inhiniero tan sientista  tayo ya ag da amta'y isabi no onkolang so kurienti tayo ed ontombok ya limamplon taon? Ta irayan planta et daan la ra ya kaokolan so mangipaalagey ya balora'n planta?

Odino inyan da'y Reyes ta piano naipanengneng to'y inkakapoy to? Inyan da'y Reyes kasi ta sikato so mamaolo na sakey ya paraan ta piano onsalindak so getma'n maoges ed onsabi'n eleksion no Mayo 2010?

Satan ya duara.

Makakelaw ya'y salat-salat ed gabiniti nen Arroyo

Makakelaw ya'y salat-salat ed gabiniti nen Arroyo. Pigara'n bulan labat la et nasumpal lay tirmino to. Akin ag to la ra pinansiansia ed puesto ra? Diad sayan kamelag na panaun, anto ni kasi nakimey darayan opisiales? Balon opisina, balon pamaakaran! Lapus ed Trade and Industry? Valisno natan ed Dipartamento na Edukasion? Agi, saray pamaakaran ya intilak nen Lapus kaokolan ya kabaten lamet nen Valisno. (Quo vadis (iner so laen to) yay MLE?) Si Favila ed Monetary Board tan arum ni ra. 

Sakey yan baleg a lingo ya wala labat so maoges ya getma sikaton intolok na pangolo.

Mar 3, 2010

Sulat na umaanlong ed saray kaanakan to

Ugaw kini natan
palbog ni’d dokolan
nonot wala’d amayo
tan kindin masamit

No makalakal kila
pidengel yo pa ya
ilaloan kon anta yo’y
salita nen Lakin Anoy

Ta no andi kaokolan
iyalis ko’d Tagalog
dila nen Balagtas
tanila’n oley natan

Onbabaleg kayo’d
salitan binayes
ed uliran tan tongtong
sankaili’y bayani

Arin eleng ag apildak
baogdan amputin
singa asukar
buek a mais-maisan

Aliwan singa’d si Siogen
maltaw a manag-anop
aluto’d agew
inames ed asin na dayat

Tan si Apo Anno
naingaran ed alog
mabiskeg a laki
galawan toy takel

Sikara’y atateng
na polin nanlapuan
dala’n onaagos ed ulat
nanayam ni’d poso’ra

Aral yo’y Pangasinan
ngeswa na kamarerwa
taningting to’t narengel ko ni
ed palandey tan kaumaan

Esaes, elek, orangal nen ugma
intikyab, inyatol na dagem
pian sikayon anak na Caboloan
makatalineng ed si Apolaki

Kabaten, kotkoten so lamot
potel kayon onalagey
aleg yon aligen saray arom
nilinguanan da’y dilin baley.

[Saya'n bersion so pinmaway ed Anacbanua (Sine Caboloan, 2009) nen Christopher Gozum.]

Feb 6, 2010

Manaltalon pilikulan Pangasinan ipaway ed UP

Diad unaan ya panangimuria to ed Ibali, ipaway na U.P. Subol diad pisasakey na Sine Caboloan tan Ulupan na Pansiansia’y Salitan Pangasinan (UPSP) say Anacbanua, say unaan ya andukey ya pilikulan digital ed salitan Pangasinan ya walaa’y talos to ed Inglis, no Pibriro 24, 2010, 7 pm, diad Cineadarna, UP Film Center, UP Diliman ed siudad na Quezon.

Inkorit, inpaway, indirihi tan inidit nen gumagawa’y pilikula ya si Christopher Gozum, sayan pilikulan experimental et analo na Digital Lokal Lino Brocka Grand Prize tan Digital Lokal Best Director Award diad mika-11 Cinemanila International Film Festival nen October 2009.

Diad pangikana’y anlong ed Pangasinan nen Santiago Villafania, Erwin Fernandez tan Melchor Orpilla, saray oraciones ed Pangasinan pati say daan ya korit ed banga na Calatagan ya babalikasen ira legan onbabatik so pilikula, say Anacbanua et tongtong na sakey ya nipolisay tan abangatan ed sagur ya umaanlong ya, onkakapoy lapu’d sakit, et manpasian onpawil ed Pangasinan, say dalin ton nianakan. Diad ipapawil to, niyabetan to say musia ya mananap ya tambal ed liliknaen to. Diad pegley to’n impan-ogip, say abagot ya umaanlong naabetan to’y ogaw ya mangantabay ed sikato legan diad panames to’d talba sosoboken sikato ed galaw dara’y abangles ya bagoong, apakger ya ayep, apanday ya balatyiang, adamili'n dalin, tan aluto'n lario ya idalan sikato ed panagbawi na abayag la’n pikakabat to’d danum, uma, tan katooan. Diad pangipaway to’d saray panagsubsubok, say umaanlong onpawil ed tugtuwan mundo’n akaparaan la’n ibagat to’y dili to diad rinasimiento na kultura na baley to; diad saya, misasakey sikato ed musia.

Nibansag ed Bulan na Arte tan Kultura ed UP Diliman, say panangipaway to pisakbayanan na panagbantay na sakey lamet ya manaltalon pilikulan experimental ya antikey nen Gozum ed salitan Pangasinan, say Surreal Random MMS Texts para ed Ina, Agui, tan Kaamong ya Makakailiw ed Sika: Gurgurlis ed Banua, ya angipanalo’d gumagawa’y pilikula ya Ishmael Bernal Award for Young Cinema nen mika-10 Cinemanila International Film Festival nen 2008.

Niletneg nen 1975, say U.P. Subol et muyongan daray omaaral ed UP ya manlapu’d Pangasinan ya mangibabawag na kulturan Pangasinan ed unibersidad. Nipaway nen 2007 nen gumagawa’y pilikula’n si Christopher Gozum, say Sine Caboloan et sakey ya kompanian gumagawa’y pilikula ya  nisipan ed panaggawa’y bokor tan niduma’n pilikula’n digital nipaakar ed rehiun na Pangasinan tan saray totoo to ed dalin ya nanlapuan tan diad biektaew. Nigapo nen 2000, say Ulupan na Pansiansia’y Salitan Pangasinan, say organisasion ya litirario’n mangitatandoro na salitan Pangasinan, et getma to so panboo na sakey ya kompog daray sumusulat ed dakel ya suri: anlong, salaysay, marakep ya nilesa’n tongtong tan marakep ya nilesa’n andi-tongtong. Say pantotogiop na taluran grupo masakbay la’n nimano so makakigtot ya pamasimbalo tan pamabolaslas na kulturan Pangasinan ed onsabi’n taon.

Diad saray tepet nipaakar ed tiket tan pangibiig, pikontak si Ana Asperin diad 0916 472 6097 odino e-buson si Erwin Fernandez diad win1tree@yahoo.com.


 Award-winning Pangasinan film to be screened at UP

The U.P. Subol in cooperation with the Sine Caboloan and the Ulupan na Pansiansia’y Salitan Pangasinan (UPSP) [Association for the Preservation of the Pangasinan Language] will screen for the first time in Metro Manila the award-winning Anacbanua (The Child of the Sun), the first full-length digital feature film in the Pangasinan language with English subtitles, on February 24, 2010, 7 pm at the Cine Adarna, U.P. Film Center, U.P. Diliman in Quezon City.

Written, produced, directed, and edited by Pangasinan filmmaker Christopher Gozum, the experimental film won the Digital Lokal Lino Brocka Grand Prize as well as the Digital Lokal Best Director Award during the 11th Cinemanila International Film Festival in October 2009.

Using the Pangasinan poetry of Santiago Villafania, Erwin Fernandez and Melchor Orpilla and Pangasinan oraciones as well as the ancient Calatagan pot script as voice-over narration, Anacbanua is a story of an exiled Western-educated Umaanlong (poet) who, suffering from an unknown illness, decides to return to Pangasinan, the land of his birth. Upon his return, he encounters the Musia (muse) who would seek the cure to his illness. While in half-sleep, the uprooted poet would meet the Ogaw (child) who would guide him in his cosmic immersion testing him in the ways of the fermented fish sauce, butchered livestock, burned metal rods, molded clay and the baked bricks leading him to finally reclaim his primal connection to the water (danum), land (uma) and his people (katooan). Upon surviving the series of tests, the poet would return to the real world ready to offer himself towards the cultural renaissance of his own people; thus, he would become one with the Musia (muse).

Coinciding with the UP Diliman Arts and Culture Month, the screening will be preceded by the showing of another prize-winning Gozum short experimental film in the Pangasinan language, the Surreal Random MMS Texts para ed Ina, Agui, tan Kaamong ya Makakailiw ed Sika: Gurgurlis ed Banua (Surreal Random MMS Texts for a Mother, a Sister and a Wife Who Longs for You: Landscape with Figures), which won for the filmmaker the Ishmael Bernal Award for Young Cinema during the 10th Cinemanila International Film Festival in 2008.

Founded in 1975, the U.P. Subol is an organization of UP students from Pangasinan promoting Pangasinan culture in the university. Founded in 2007 by filmmaker Christopher Gozum, the Sine Caboloan is a film production company committed to producing independent digital feature films about the Pangasinan region and its people in the homeland and in the diaspora.  Established in 2000, the Ulupan na Pansiansia’y Salitan Pangasinan, the only literary organization promoting the Pangasinan language, aims to create a pool of creative writers in various genres: poetry, essay, creative fiction as well as creative non-fiction. The gathering of these three organizations presages the exciting revitalization and development of Pangasinan culture in the years to come.

For ticket inquiries and reservations, please contact Ana Asperin at 0916 472 6097 or e-mail Erwin Fernandez at win1tree@yahoo.com.

Jan 15, 2010

Panagkerew na anunsio ed Balon Silew

Onkekerew na anunsio so Balon Silew ta piano naipalapag so ontombok ya paway to.
Mangaawat kami na anunsio'd negosio, kasal, binyag, togiopan dara'y mankaklasi
(reunion), eleksion tan antokaman ya nayarin iyanunsio. Saraya so bili na
anunsio:

Beneg ya sakob (paway) P7000 (dikolor)
Beneg ya sakob (loob) P5500 (dikolor)
Arap ya sakob (loob) P6000 (dikolor)
Sakey bolong (laman) P5000 (dikolor)
Sakey bolong P4500 (BW)
3/4 na bolong P3000 (BW)
1/2 na bolong P2000 (BW)
1/4 na bolong P1000 (BW)
1/8 na bolong P 500 (BW)

Mantepet ed sayan numero: 09152881008 odino mankorit na email ed
balonsilew@yahoo.com.

Itandoro so Pangasinan; mansalita, mankorit tan manbasa'y Pangasinan!

Tawag para'd kontribusion ed Balon Silew Tn 10 Blg. 1 (2010)

Mantatawag so Balon Silew ya kontribusion ed anlong, antikey ya tongtong
(1500-3000 ya salita), salaysay (1000 ya salita), balita, konbilay (novel)(sakey
tekap [chapter] 3000 salita; walaay walora anggad sampluran tekap); pangiyolog
na maltaw ya litiratura ed Pangasinan: anlong, antikey ya tongtong odino
konbilay; anlong odino antikey ya tongtong ed Iloko; anlong odino antikey ya
tongtong ed Binubolinao; salaysay ed Inglis nipaakar ed Pangasinan; tan kansion
ed Pangasinan. Ipawit ira ed balonsilew@yahoo.com.

Unaan ya deadline: Iniro 31, 2010
Otit ya deadline: Pibriro 15, 2010

Jan 12, 2010

Kaokolan so dumadasig (columnist) ed Balon Silew

Kaokolan mi so sumusulat na dasig ed Balon Silew. No sarag yo so mansulat ya
antikey ya salaysay (1000 salita) ed salitan Pangasinan nipaakar ed amta yon
maung (espesialisasion) singa nipaakar ed panagdalos, panagsigay, awaran na
Pangasinan, bilay na istudianti, bilay ed biektaew, panag-anlong, panag-alwar ed
sakit, kanonotan daray maistro/maistra ed abeba, atagey ya eskuela odino
kolihio, kakabatan ed ley (legal affairs), isports (odino pakasilan), panangaro
(singa Dear Dr. Love) tan antokaman ya nayarin isulat, mangipawit kayo'y
proposal ed balonsilew@yahoo.com tan sample na inkorit yo. Makaoley kayo no
antoy ingaran yo'd dasig yo ed Pangasinan. Aliwan patbek so panaglitra ta siak
bilang editor/manangikurang so makaoley ya manapiger.

Unaan ya deadline: Iniro 31, 2010
Otit ya deadline: February 15, 2010

Saray Sanga na UPSP

Diad embeneg ya limogan na UPSP nen Disiembri 27, 2009, apasiaan ya mangiletneg
ya sanga na UPSP ed amin ya baley na Pangasinan, ed arum ya pasen ed Pilipinas
(Camiling, Baguio, Paniqui, Manila, Mindanao etc.) tan diad biektaew: Hawaii,
California, Saudi Arabia etc.

Unaan dia so sanga ed siudad na Dagupan, Alaminos, San Carlos, Urdaneta,
Pozorrubio, Lingayen. Mawayang saray miembro dia no labay da met so mangiletneg
na sanga ed baley da balet kaokolan ya manpatanir ed sengeg ya UPSP. Odino
mimiembro ira ed sarayan sanga.

Say mamaolo ed sanga na UPSP ed

Dagupan:
Simon R. Vistro
09174914495

Alaminos:
Melchor E. Orpilla
09213156701

San Carlos:
Digna Selmo/Jesamyne Diokno/Guido Tiong
09291693774/09276262252

Urdaneta:
Erwin S. Fernandez
09152881008

Pozorrubio:
Mel V. Jovellanos
(075)5663533

Lingayen:
Catalina L. Felicitas/Elnora B. Dudang
09175086621/09197469329

Bugallon:
Sergio A. Bumadilla
09277115519

Say getma na sarayan sanga et mangalay miembro'n mangitandoro na salitan
Pangasinan ed litirario tan audio-bisual ya kimey da. Nayarin mila saray
sumusulat ed Inglis, Iloko, Bolinao tan Tagalog balet nakaokolan ya malinew ed
poso ra so getma'n pabulaslasen so litiraturan Pangasinan. Ed arum ya salita,
kaokolan ya mankorit ira ed Pangasinan odino ibawag da'd kimey da'd pinta,
musika, tiatro, panag-ukit so salitan Pangasinan.

Naigapo la so rinasimiento na kulturan Pangasinan. Itoloy ti la sayan marakep ya
kimey ta piano nagamoran so tugtuwan kawayangan na linawa daray Pangasinense!

Jan 3, 2010

Balon Silew akapaway la! Mangaliw ki la!



Mangaliw kila, P50 kada kopia biig ni'd lokal odino internasional ya bili na pangibuson.

Walay 49 ya kopia ed San Carlos City ed

DSS Prints & Designs
Quezon Boulevard, San Carlos City
Proprietor: Mrs. Digna S. Selmo
09291693774 tan (075)532 2594

20 kopia ed

Mamalol's Restaurant
297 Tapuac District
c/o Rob Erfe-Mejia
09164749272

tan 10 kopia ed

Red Designs
kaabay lamlamang na Mamalol's
c/o Red Erfe-Mejia

Odino si Simon Vistro 09174914495, sfbrvistro[at]gmail.com

tan 100 kopia ed kinen

Erwin S. Fernandez
4 Mitura St. San Vicente West, Urdaneta City
09152881008
win1tree[at]yahoo.com

Bantog Iran Post